وسعت اللہ خان بی بی سی اردو ڈاٹ کام

	نیگرو پونٹے نے سائیگان کے امریکی سفارتخانے میں پولٹیکل آفیسر کے طور پر ڈپلومیٹک کیرئیر کا آغاز کیا

نیگرو پونٹے کی امریکی ڈپلومیسی کی موجودہ تاریخ میں وہی اہمیت ہے جو مسلم تاریخ میں عبیداللہ ابنِ زیاد کی ہے۔

نیگروپونٹے نے انیس سو ساٹھ میں سائیگان کے امریکی سفارتخانے میں پولٹیکل آفیسر کے طور پر ڈپلومیٹک کیرئیر کا آغاز کیا اور اس حیثیت میں یکے بعد دیگرے آنے والی جنوبی ویتنام کی کٹھ پتلی حکومتوں کے مشیر رہے۔

انیس سو اکہتر سے تہتر تک نیگروپونٹے ڈاکٹر ہنری کیسنگر کے تحت نیشنل سکیورٹی کونسل میں ویتنامی امور کے نگراں مقرر رہے۔ یہ وہ دور تھا جب امریکی بی باون طیارے شمالی ویتنام پر روزانہ سینکڑوں ٹن بم برسا رہے تھے اور کمبوڈیا کے خلاف امریکہ نے غیر اعلانیہ جنگ شروع کردی تھی۔

لیکن نیگرو پونٹے کا نام امریکی پریس میں سن اکیاسی سے آنا شروع ہوا جب انہیں ریگن انتظامیہ نے وسطی امریکہ کے ملک نکاراگوا کے ہمسائے ہنڈوراس میں اگلے پانچ برس تک اپناسفیر رکھا۔

اس وقت ہنڈوراس میں جنرل گستاؤو مارٹینز کی آمریت سیاسی مخالفین کو خفیہ فوجی ڈیتھ سکواڈز کے ذریعے ہلاک یا غائب کر رہی تھی۔

لیکن نیگرو پونٹے نے بحثیت سفیر امریکی سینیٹ کی خارجہ تعلقات کمیٹی کو انسانی حقوق سے متعلق جو بھی سالانہ رپورٹ بھیجی اس میں ہمیشہ یہی کہا گیا کہ ہنڈوراس میں نہ تو کوئی ڈیتھ سکواڈ متحرک ہے اور نہ ہی کوئی سیاسی قیدی ہے۔

نیگرو پونٹے کے دور میں ہنڈوراس کی فوجی جنتا کی امریکی فوجی امداد چار ملین ڈالر سے بڑھ کر ستتر ملین ڈالر اور اقتصادی امداد باون ملین ڈالر سے بڑھ کر دو سو تیس ملین ڈالر تک پہنچ گئی۔

نیگرو پونٹے نے سلامتی کونسل سے صدام حسین کے خلاف فوجی کارروائی کی اجازت حاصل کرنے کے لیے سلامتی کونسل کے غریب رکن ممالک کا ووٹ امداد میں بڑھوتری یا حمایت نہ ملنے پر امداد میں کٹوتی کی دھمکی کے ذریعے خریدنے کی کوشش کی۔ میکسیکو اور چلی کی حکومتوں پر دباؤ ڈالا گیا کہ وہ امریکی قرار داد کی کھلی مخالفت کرنے والے اپنے سفیر تبدیل کریں

ہنڈوراس کے ایک سابق رکنِ کانگریس ایفریان ڈائز کے بقول نیگرو پونٹے سمیت امریکی انتظامیہ کو نکاراگوا کی بائیں بازو کی حکومت کے خلاف کونٹرا باغیوں کو کھڑا کرنے کے لئے ہنڈوراس کے علاقے کی ضرورت تھی اور یہ ضرورت انسانی حقوق کے احترام سے زیادہ اہم تھی۔

انیس سو ستانوے میں سی آئی اے کی تحقیقاتی رپورٹ میں اعتراف کیا گیا کہ سن اسی کے عشرے میں ہنڈوراس میں سرکاری ڈیتھ اسکواڈز نے سینکڑوں مرتبہ انسانی حقوق کی پامالی کی۔ یہ رپورٹ جب ظاہر ہوئی تو نیگروپونٹے میکسیکو میں کلنٹن انتظامیہ کے سفیر کے طور پر حکومتِ میکسیکو کو ملک کے جنوبی علاقے میں زپاٹا چھاپہ مار تحریک سے نمٹنے کے طریقے بتا رہے تھے۔

سن دو ہزار ایک میں بش جونیئر نے نیگروپونٹے کو اقوامِ متحدہ میں امریکی سفیر مقرر کیا۔ اس حیثیت میں انہوں نے سلامتی کونسل سے صدام حسین کے خلاف فوجی کارروائی کی اجازت حاصل کرنے کے لیے سلامتی کونسل کے غریب رکن ممالک کا ووٹ امداد میں بڑھوتری یا حمایت نہ ملنے پر امداد میں کٹوتی کی دھمکی کے ذریعے خریدنے کی کوشش کی۔ سلامتی کونسل کے ارکان کی گفتگو ٹیپ کرنے کی کوششیں ہوئیں اور میکسیکو اور چلی کی حکومتوں پر دباؤ ڈالا گیا کہ وہ امریکی قرار داد کی کھلی مخالفت کرنے والے اپنے سفیر تبدیل کریں۔

کئی حکومتیں اتنی اچھی نہیں ہوتیں جتنی اچھی امریکی لوگ دیکھنا چاہتے ہیں۔ وجہ یہ ہے کہ جب آپ کسی ملک میں آمرانہ نظام کے بجائے جمہوریت کی حمایت کرنا چاہتے ہیں تو بعض اوقات اس ملک یا اردگرد کے حالات آپ کو تبدیلی کی حمایت کی اجازت نہیں دیتے۔ یوں آپ کے ہاتھ بندھ جاتے ہیں نیگروپونٹے

سن دو ہزار پانچ میں نیگرو پونٹے کو ڈائریکٹر نیشنل انٹیلی جینس کے طور پر سی آئی اے سمیت تمام سراغرساں ایجنسیوں کا سپر باس بنا دیا گیا اور جنوری دو ہزار سات میں وہ ڈپٹی وزیرِ خارجہ بن گئے۔

سن دو ہزار ایک میں سی این این کو ایک انٹرویو دیتے ہوئے جان نیگرو پونٹے نے کہا: ’ کئی حکومتیں اتنی اچھی نہیں ہوتیں جتنی اچھی امریکی لوگ دیکھنا چاہتے ہیں۔ وجہ یہ ہے کہ جب آپ کسی ملک میں آمرانہ نظام کے بجائے جمہوریت کی حمایت کرنا چاہتے ہیں تو بعض اوقات اس ملک یا اردگرد کے حالات آپ کو تبدیلی کی حمایت کی اجازت نہیں دیتے۔ یوں آپ کے ہاتھ بندھ جاتے ہیں‘۔

جان نیگرو پونٹے نے اسلام آباد میں کہا کہ یہ صدر مشرف پر منحصر ہے کہ وہ کب وردی اتارتے ہیں۔ اس کے بعد وہ اپنے ڈپٹی رچرڈ باؤچر، سینٹرل کمانڈ کے سربراہ ایڈمرل فالن اور پاکستانی وزیرِ خارجہ خورشید محمود قصوری کے ساتھ واشنگٹن پرواز کرگئے۔