انور سن رائے بی بی سی اردو ڈاٹ کام، لندن

	چارلی چپلن دنیا کے وہ ایکٹر، ڈائریکٹر اور فلم ساز ہیں جن کی دو فلمیں دنیا میں اب تک بنائی جانے والی دس بہترین فلموں میں شمار کی جاتی ہیں

اس فلم کی فلمبندی 31 دسمبر 1927 میں شروع ہوئی اور 22 جنوری 1931 میں مکمل ہوئی۔

سو سال کی سوبہترین فلمیں

’سٹی لائٹس‘ کے مداحوں کی تعداد اور اہمیت سے قطع نظر میری ذاتی رائے میں بھی بلا شبہ ’سٹی لائٹس‘ ایک ایسی فلم ہے جو چارلی چپلن کی تخلیقی شخصیت کے تمام پہلوؤں کی نمائندگی کرتی ہے۔

چپلن اس فلم کے پروڈیوسر ہیں۔ انہوں نے یہ فلم ڈائریکٹ کی ہے۔ وہ اس فلم کے مصنف ہیں۔ وہ اس فلم کے مرکزی اداکار ہیں۔ اس فلم کے رقص بھی انہوں نے ترتیب دیئے ہیں اور اس فلم کی موسیقی بھی دی ہے۔

چپلن فلمی دنیا کے وہ آدمی ہیں جن کی کسی فلم کے بارے میں غیر اہم یا ناپسندیدہ ہونے کی بحث نہیں ہوتی بلکہ بحث یہ ہوتی ہے کہ کون سی فلم زیادہ اہم ہے اور کون سی فلم کسی آدمی کے لیے زیادہ پسندیدہ۔

	سٹی لائٹس کے اس آخری منظر کو فلم کی دنیا میں سب سے بہترین اختتام قرار دیا جاتا ہے اس منطر میں ایک ساتھ یاس، امید، خوشی، دکھ، یقین اور بے یقینی کے تاثرات کو بھر پور انداز میں لانے کے لیئے چارلی چپلن نے اس منظر کی 342 مرتبہ فلم بندی کی

خود فلمی دنیا کے ماہرین اور نقاد ’دی گولڈ رش‘ اور ’دی گریٹ ڈکٹیٹر‘ کو سنیما کی تاریخ کی اہم ترین فلمیں تصور کرتے ہیں لیکن شاید ’سٹی لائٹس‘ میں پلاٹ سے موسیقی تک مزاح اور دکھ کا ایسا بے مثل امتزاج ہے جس نے فلم کو ناقابلِ فراموش بنا دیا ہے۔

فلم کی کہانی بہت ہی سادہ سی ہے۔

پہلے منظر میں بولتی فلموں اور سیاستدانوں یا شہری رہنماؤں کا مذاق اڑایا گیا ہے جب ہم امن اور خوشحالی کا سب ٹائیٹل دیکھتے ہیں تو اس کا انجام ایک خستہ حال اور بظاہر آوارہ منش کے جاگنے پر ہوتا ہے۔

دوسرے منظر میں یہی آورہ منش سڑک پر جا رہا ہے اور اخبار فروش اس کا مذاق اڑا رہے ہیں۔ تیسرے منظر میں وہ ایک دکان کے سامنے کھڑا ہے اور اس کے اندر رکھے بے لباس عورت کے مجسمے کو مختلف زاویوں سے اس طرح دیکھنے کی کوشش کر رہا جیسے مجسمے کی فنی حیثیت کا جائزہ لینے کی کوشش کر رہا ہو۔ اس میں وہ اتنا محو ہوتا ہے کہ سب کچھ بھول جاتا ہے لیکن پھر یہ سارا منظر پھول بیچنے والی ایک لڑکی کی آمد میں دب جاتا ہے۔ لڑکی خستہ حال کے قریب پہنچتی ہے اور وہ اس سے عشق بگھارنے کو کوشش کرنے لگتا ہے اسی دوران لڑکی کے ہاتھ سے پھول گر جاتا ہے اور جب وہ پھول کو تلاش کرنے کی کوشش کرتی ہے تو اس خستہ حال کو احساس ہوتا ہے کہ پھول بیچنے والی اندھی ہے۔

	یہ فلم میں اندھی لڑکی (ورجینیا) اور خستہ حال کی پہلی ملاقات ہے۔ چھونے کے اسی انداز کو چارلی چپلن میں آخری منظر میں پہچان کا ذریعہ بنایا ہے

اگلے چند منظر میں اس خستہ حال کی ایک انتہائی دولت مند سے اس وقت دوستی ہوتی ہے جب وہ خود کشی کرنے کی کوشش کر رہا ہوتا ہے اور وہ اسے مشورہ دیتا ہے ’کل پرندے گائیں گے، بہادر بنو اور زندگی کا سامنا کرو‘ دولت مند اس خستہ حال کو زندگی بھر کا دوست بنا لیتا ہے اور پھول بیچنے والی لڑکی کا سن کر اسے اپنی لیموزین اور پیسے دیتا ہے اور پھول خریدنے کے لیے بھیجتا ہے۔ وہ پھولوں کی پوری ٹوکری خرید لیتا ہے اور لڑکی کو گھر پہنچانے کی پیشکش کرتا ہے اس سے لڑکی کا یہ خیال اور پکا ہو جاتا ہے کہ اس سے محبت جتانے والا کوئی دولت مند ہی ہے۔

لیکن خستہ حال کا دولت مند دوست دوہری شخصیت کا مالک ہے جب وہ نشے میں ہوتا ہے تو اسے پہچانتا ہے اور جب نشہ اترتا ہے تو اسے پہچانے سے بھی انکار کردیتا ہے۔

اسی حال میں وہ اسے نکال دیتا ہے اور وہ ایک دکان پر کام کرنے لگتا ہے لیکن جب وہ لڑکی سے ملنے جاتا ہے اور لڑکی کے کہنے پر اس کے بستر کے قریب پڑی میز پر پڑا خط پڑھ کر سناتا ہے تو انکشاف ہوتا ہے کہ اگر لڑکی بڑی ماں نے بیس ڈالر ادا نہیں کیئے تو مالکِ مکان انہیں گھر سے نکال دے گا۔ لڑکی کے پاس اتنے پیسے نہیں ہیں وہ اسے تسلی دیتا ہے کل صبح وہ یہ رقم ادا کر دے گا لیکن اسی روز اسے دیر سے جانے پر دکان سے فارغ کر دیا جاتا ہے۔

ایک بار پھر اس بھلکڑ دولت مند دوست سے ملاقات ہوتی ہے اور وہ پھر اسے گھر لے جاتا ہے اور اس سے نابینا لڑکی کا مسئلہ سن کر فوراً ایک ہزار ڈالر نکال کر دیتا ہے لیکن ابھی وہ ڈالر جیب میں رکھتا ہی ہے کو دو چور آ جاتے ہیں اور لیکن جب خستہ حال پولیس کو بلانے جاتا ہے تو وہ بھاگ جاتے ہیں اس تگ و دو میں بھلکڑ کا نشہ اتر جاتا ہے، اور وہ چوری کا الزام اپنے غریب دوست پر لگا دیتا ہے۔ غریب کو احساس ہوتا ہے کہ رقم اس کے جیب میں ہے اس صورت میں دنیا کی کوئی دلیل اس کے کام نہیں آسکے گی۔ اس لیے وہ بھاگتا ہے اور رقم لڑکی کو دے آتا ہے تاکہ وہ گھر کا معاملہ بھی نمٹا لے اور آنکھوں کا آپریشن بھی کرا لے۔

سفید گلاب اور سکہ  غریب نوجوان لڑکی کی دکان کی طرف جاتا ہے اور باہر سے لڑکی کو دیکھتا ہے لڑکی دادی کو بتاتی ہے کہ باہر اس کے حسن کا ایک مداح آیا ہے۔ وہ اس مدد کرنے کا سوچتی ہے اور دکان کے باہر آکر غریب کو سفید گلاب کا ایک پھول دیتی ہے اور ایک سکہ، لیکن جب وہ سکہ اس کے ہاتھ پر رکھتی ہے تو اسے ہاتھ کے لمس سے شناسائی کا احساس ہوتا ہے

غریب نوجوان لڑکی کی دکان کی طرف جاتا ہے اور باہر سے لڑکی کو دیکھتا ہے لڑکی دادی کو بتاتی ہے کہ باہر اس کے حسن کا ایک مداح آیا ہے۔ وہ اس مدد کرنے کا سوچتی ہے اور دکان کے باہر آکر غریب کو سفید گلاب کا ایک پھول دیتی ہے اور ایک سکہ، لیکن جب وہ سکہ اس کے ہاتھ پر رکھتی ہے تو اسے ہاتھ کے لمس سے شناسائی کا احساس ہوتا ہے وہ اپنے ہاتھ کو اس کے ہاتھ سے اس کے کوٹ پر لے جاتی ہے اور پہچان لیتی ہے کہ یہ آدمی وہی ہے جس نے ان کی مدد کی تھی۔

یہیں وہ منظر ہے جسے فلمی دنیا میں کسی بھی فلم کے عمدہ ترین اختتام کے طور پر جانا جاتا ہے۔

لڑکی کہتی ہے: تم؟
وہ جواب دیتا ہے: کیا، اب تم دیکھ سکتی ہو؟
وہ اس کا ہاتھ تھامتی ہے اس کے چہرے پر انبساط و خوشی کے گہرے جذبات اور مسکراہٹ ہے اور وہ کہتی ہے: ہاں، اب میں دیکھ سکتی ہوں۔

اسی پُر جذبات منظر پر فلم ختم ہوتی ہے۔ لیکن اس کہانی کو لفظوں میں بیان کرنے سے وہ بات نہیں پیدا ہوتی جو سکرین پر ہے۔ یہی چالی چپلن کی فلم سازی کا حسن ہے کہ انہوں نے اس زمانے میں کیمرے اور دوسری دستیاب فنی سہولتیوں کو اس طرح استعمال کیا کہ اس سے بہتر کیا ہی نہیں جا سکتا ہے اور شاید یہی وجہ ہے انہیں فلم کی دنیا کا عظیم ترین آدمی شمار کیا جاتا ہے۔

سٹی لائٹس کے آخری منظر کو فلم کی دنیا میں سب سے بہترین اختتام قرار دیا جاتا ہے اس منطر میں ایک ساتھ یاس، امید، خوشی، دکھ، یقین اور بے یقینی کے تاثرات کو بھر پور انداز میں لانے کے لیئے چارلی چپلن نے اس منظر کی 342 مرتبہ فلم بندی کی۔ اس سےس یہ بات ظاہر ہوتی ہے کہ جب چپلن اس منظر کی فلمبندی کر رہے تھے تو ان کےذہن میں اس منظر کو بصری تصور موجود تھا اور انہوں نے ساور انہوں نے بار بار کی فلمبندی اسی تصور تک رسائی کے لیے کی۔

اور واقعی چارلی چپلن عظیم تھا اور ہے کیونکہ دنیا اب تک دوسرا چپلن پیدا نہیں کر سکی۔ ہم نے بہت سے مزاحیہ فنکار پیدا کیے، بہت سے فلمساز اور عظیم ترین ہدایت کار پیدا کیے لیکن جو مجموعی احساس اور شعور چپلن میں تھا وہ دنیا بھر کی فلمی صنعت میں آنے والے کسی اور فلمساز اور ہدایتکار میں نہیں دیکھا گیا۔ اور ’سٹی لائٹس‘ چپلن کی مکمل تصویر ہے۔ شاید یہی وجہ ہے کہ اورسن ویلس ’سٹی لائٹ‘ کو دنیا میں اب تک بننے والی عظیم ترین فلم قرار دیتے ہیں اور وہی یہ بات کہہ سکتے ہیں کیونکہ انہیں ہی اس دور میں یہ کہنے کا مقام حاصل ہے۔