انور سن رائے بی بی سی اردو ڈاٹ کام، لندن

	’دی گولڈ رش‘ کا ایک پوسٹر

رقص اور مزاح کے ذریعے تاریخ

اور بہت سے لوگوں کی طرح ایک غریب اور بے روزگار نوجوان (چارلی چپلن) جس پر جوانی ہی میں بڑھاپے کے آثار ہیں اور جو ایک خاص طرح کی بے ڈھب وضع رکھتا ہے سونے کی تلاش میں پہاڑ پر چکرا رہا ہے اور برفباری کے طوفان سے بچنے کے لیے کوئی جگہ ڈھونڈ رہا ہے۔ پہاڑ کی چوٹی پر اسے ایک کیبن دکھائی دیتا ہے جس میں پہلے سے بگ جیم موجود ہے۔

بگ جیم نوجوان کے برخلاف ایک بڑے قد کاٹھ کا ایسا آدمی ہے جو دیکھنے ہی سے خطرناک آدمی لگتا ہے۔ تھوڑی سے کشاکش کے بعد دونوں کو احساس ہو جاتا ہے کہ ان کے پاس ایک دوسرے کا ساتھ دینے کے سوا کوئی چارہ نہیں ہے لیکن جلد ہی ان کے پاس کھانے کی ہر چیز ختم ہو جاتی ہے۔

فلم کے اس حصے کا سب سے عمدہ اور شاید فلم اور فن کی دنیا کا سب سے عمدہ حصہ وہ منظر ہے جس میں بھوک سے نمٹنے کے لیے چارلی چپلن اپنا جوتا ابالتا ہے اور دونوں اسے کھاتے ہیں۔

	جورجیا اور چارلی چپلن

میرے خیال میں انسانی المیہ اس سے آگے نہیں جا سکتا لیکن چپلن کا المیہ ایسا ہے کہ روتے ہوئے ہنسی اور ہنستے ہوئے رونا آتا ہے۔ ہومر اور چپلن میں شاید یہی فرق ہے۔

فلم کا دوسرا حصہ جو ایک دوسری نوع کے المیے کا اظہار ہے محبت کے بارے میں ہے۔ اس حصے میں چارلی چپلن جورجیا سے محبت میں مبتلا ہو جاتا ہے اور نئے سال کی دعوت پر اسے اور اس کے دوستوں کو بلاتا ہے۔

اس کے پاس کچھ بھی نہیں ہے اور اس نے دعوت کا سامان خریدنے کے لیے دکانوں کے سامنے جمی برف ہٹا کر اتنی رقم جمع کر لی ہے کہ لڑکی کے لیے روسٹ چکن اور کچھ دوسری اشیاء خرید سکے۔ مہمانوں کی آمد سے پہلے اس نے کیبن کو اور ایک چھوٹی سے میز کو سجایا ہے۔

شوق کا عالم یہ ہے کہ تیاری کا سارا کام وقت سے بہت پہلے ختم ہو چکا ہے۔ اب اس کی حالت بالکل ویسی ہی تھی جیسی دوستوفسکی کے کردار پرنس میشکن کی اس وقت تھی جب اس نے نستاسیا فلی پونا سے صبح کی سیرکے وقت باغ میں ملنے کا طے کیا تھا اور رات ہی سے باغ میں جا کر بیٹھ گیا تھا کہ کہیں دیر نہ ہو جائے۔

لیکن جب دن طلوع ہونے کو تھا تو انتظار کی تاب دم توڑ گئی اور جب نستاسیا آئی تو اس نے پرنس کو سوتا ہوا پایا۔ اسی طرح چپلن بھی مہمانوں کے انتظار میں میز کے پاس بیٹھا بیٹھا سو جاتا ہے۔

	پہلی فلم کا بڑا حصہ چارلی چپلن نے الاسکا میں جا کر اصل ماحول میں کیا لیکن بعد میں اسے دوبارہ بھی شوٹ کیا

اس کے بعد وہ ڈبل روٹی کے ایک رول میں دو کانٹے اس طرح پھنساتا ہے کے وہ اس کے جوتوں کی سی شکل اختیار کر لیتے ہیں جس کے بعد وہ ایک انوکھا سا رقص شروع کرتا ہے اور میز پر بیلے کے مختلف سٹپ یا انداز پیش کرتا ہے۔

اس موقعے کی لائیٹنگ اور فریمنگ انتہائی تخلیقی ہے۔ جورجیا اور اس کے دوست اس کے رقص سے جب بہت لطف اندوز ہو رہے ہوتے ہیں تو اس کی آنکھ کھل جاتی ہے۔ آنکھ کھلتی ہے تو وہ خود کو میز کے قریب اکیلا پاتا ہے۔ رات آدھی کے قریب بیت چکی ہے لیکن نہ تو جورجیا آئی ہے اور نہ ہی اس کے دوست، شاید انہیں تو یہ بھی یاد نہیں رہا کہ انہیں کسی کی دعوت میں جانا تھا۔

وہ کیبن کی کھڑکی میں جاتا ہے اور باہر قصبے کے کانکنوں اور جورجیا اور دوسرے لوگوں کو ہاتھوں میں ہاتھ ڈالے گانا گاتے دیکھتا ہے۔ گانا ختم ہوتا ہے تو خوشی کے اظہار کے لیے ہوائی فائرنگ کی جاتی ہے جو اس کے اداسی اور اکیلے پن کا تضاد ہے۔

انیس سو پچیس میں بنائی جانے والی 80 منٹ کی یہ فلم چپلن کے اُن الفاظ کی عکاسی کرتی ہے جو انہوں نے ایک بار اپنی خود نوشت سوانح کے بارے میں کہے تھے ’غیر ارادی مزاح‘ ۔

مجھے نہیں پتہ کے مغربی فلسفی اور مفکرین چپلن اور ان کی فلموں کو اپنی سنجیدہ فکر کے دھارے سے کس طرح جوڑتے ہیں۔ میری کم علمی ہے کہ میں نے اب تک کوئی ایسی تحریر نہیں دیکھی جو ان کے اس پہلو کو اجاگر کرتی ہو لیکن مجھے یہ محسوس ہوتا ہے کہ وجودی تنہائی اور ’ناراض نوجوان‘ کے تصور کا روپ دھارنے والی فکر اگر تمام کی تمام چپلن کی فلموں کے اثر سے پیدا نہیں ہوئی تو اس نے اسے شکل دینے میں اہم کردار ضرور ادا کیا ہو گا۔

چارلی چپلن ضرور بہت جلد ایک خوشحال و مشہور آدمی ہو گئے اور محترم بھی تسلیم کیے گئے لیکن وہ اپنے بچن کی غربت اور ہزیمت کو کبھی فراموش نہیں کر سکے اور شاید وہ ایسا کرنا بھی نہیں چاہتے تھے۔

	چپلن کی اداکاری اور سوچ نے فلم کے بے آواز زمانے کو ہمیشہ کے لیے ناقابلِ فراموش بنا دیا

اس فلم کی جو شکل اب عام دستیاب ہے وہ 1942 میں جاری کی گئی تھی۔اس کے لیے چپلن نے نہ صرف یہ کہ فلم کے تمام ٹائٹل کارڈ اور موسیقی تبدیل کی بلکہ ساؤنڈ ایفکٹ یا صوتر تاثرات اور نیریشن و کمنٹری بھی تبدیل کر دی۔

کہا جاتا ہے کہ بظاہر چپلن نے یہ تبدیلیاں کاپی رائٹ ایکٹ کے لیے کیں لیکن فنی طور پر بھی 1925 کی فلم اور 1942 کی فلم میں بہت فرق ہے اور نقاد اس بات سے اتفاق کرتے ہیں کہ چپلن نے 1942 میں دستیاب سہولتوں سے بھر پور فائدہ اٹھایا ہے حالانکہ یہ دوسری عالمی جنگ کا زمانہ تھا۔

لیکن دونوں فلموں میں ایک فرق بہت نمایاں ہے۔ پہلی فلم کا اختتام اس طرح ہوتا ہے کہ فلم کے آخری منظر میں فوٹوگرافر چپلن اور جورجیا کی تصویریں بنارہے ہیں اور اور دونوں ایک دوسرے کا پُر جوش اور طویل بوسہ لے رہے ہیں جب کہ 1942 کی فلم سے یہ منظر غائب ہے اور اس کی بجائے فلم اس پر ختم ہوتی ہے کہ دونوں سیڑھی نما مقام پر ایک دوسرے سے جدا ہو رہے ہیں اور چپلن اپنی پُر مزاح آواز میں یہ جملہ کہتے ہوئے سنائی دیتے ہیں کہ دونوں آگے کہیں مستقبل میں ایک ہو جائیں گے۔

یہ بھی کہا جاتا ہے کہ چپلن نے شاید یہ محسوس کیا تھا کہ مجموعی طور پر ان کی فلم کے لیے طویل بوسے پر اختتام کا منظر ضرورت سے زیادہ پرمسرت انجام ہے۔

دی گولڈ رش 1942  دی گولڈ رش کی جو شکل اب عام دستیاب ہے وہ 1942 میں جاری کی گئی تھی۔اس کے لیے چپلن نے نہ صرف یہ کہ فلم کے تمام ٹائٹل کارڈ اور موسیقی تبدیل کی بلکہ ساؤنڈ ایفکٹ یا صوتر تاثرات اور نیریشن و کمنٹری بھی تبدیل کر دی

لیکن چارلی چپلن کی پہچان شاید فلمی تکنیک پر ان کی دسترس نہیں ہے ان کی اداکاری اور وہ سوچ ہے جس نے فلم کے بے آواز زمانے کو ہمیشہ کے لیے ناقابلِ فراموش اور یادگار بنا دیا۔