ریحانہ بستی والا بی بی سی اردو ڈاٹ کام، ممبئی

	اے ٹی ایس سربراہ کے مطابق مالیگاؤں دھماکہ ملزمین کی ٹیپ کی گئی گفتگو میں موتھالک کا ذکر آیا ہے

اے ٹی ایس سربراہ کے پی رگھوونشی نے بی بی سی سے گفتگو کے دوران اس خبر کی تصدیق کی۔اسسٹنٹ پولیس کمشنر اور ماتحت پولیس اہلکاروں کے ساتھ تین رکنی ٹیم منگلور گئی ہے۔

اے ٹی ایس سربراہ کے مطابق مالیگاؤں دھماکے کے ملزمان کی ٹیپ کی گئی گفتگو میں موتھالک کا ذکر آیا ہے ۔ انکا کہنا تھا کہ اس دھماکے کے ملزمان موتھالک کی آئیڈیالوجی سے بہت متاثر تھے۔خاص طور پر کرنل پرساد پروہت اور سادھوی پرگیہ سنگھ ٹھاکر۔

اے ٹی ایس افسر کے مطابق ان کے پاس دھماکے کے ملزمان کی جو گفتگو ریکارڈ ہے اس میں کرنل پروہت نے مبینہ طور پر یہ کہا تھا کہ موتھالک نے کرناٹک میں بہت ہی اچھا کام کیا ہے، وہ ان کے کام سے بہت ہی متاثر ہیں۔

اے ٹی ایس نے مالیگاؤں بم دھماکے کے ملزمان کے خلاف چار ہزار سے زائد صفحات پر مشتمل چارج شیٹ عدالت میں داخل کی ہے اور کرنل کی یہ گفتگو بھی اس کا حصہ ہے۔

اے ٹی ایس افسر کے مطابق صرف کرنل پروہت ہی نہیں سادھوی پرگیہ سنگھ ٹھاکر بھی پرمود کی تقاریر سے کافی متاثر تھیں۔ پولیس کے مطابق پرمود کے خلاف اشتعال انگیز تقاریر کرنے کے کئی کیس درج ہیں۔

موتھالک کے بارے میں پولیس کا کہنا ہے کہ وہ پہلے وشو ہندو پریشد اور بجرنگ دل کی سرگرم رکن تھے بعد میں انہوں نے اپنی تنظیم سری رام سینا قائم کی۔

موتھالک اس وقت پولیس حراست میں ہیں انہیں منگلور پولیس نے گزشتہ روز گرفتار کیا تھا۔

پولیس کے مطابق سنیچر کے روز ان کی تنظیم کے ورکروں نے منگلور میں ایک شراب خانے سے لڑکیوں کو دوڑا کر مارا تھا۔ سخت گیر نظریات کے حامل موتھالک کا کہنا ہے کہ کھلے عام اس طرح لڑکیوں کا میل ملاپ ان کے کلچر کے خلاف ہے۔