لفٹیننٹ جنرل سنہا نے کہا کہ وہ سوامی دیا نند سے کبھی نہیں ملے

جنرل سنہا نے ایک ٹی وی چینل سے انٹرویو میں کہا کہ وہ ان لوگوں کے خلاف قانونی کارروائی کرنے کے بارے میں سوچ رہے ہیں جنہوں نے یہ الزامات لگائے ہیں۔

انہوں نے کہا کہ ’یہ الزام بالکل جھوٹا اور بدنیتی پرمبنی ہے ۔ یہ الزامات ایک ایسے وقت میں لگا ئے جا رہے ہیں جب صوبے میں انتخابات ہو رہے ہیں۔‘

جموں و کشمیر کے سابق وزیر اعلیٰ مفتی محمد سعید نے کہا تھا سوامی دیانند نے گونر سنہا سے راج بھون میں ملاقات کی تھی اور وہ سرکاری مہمان تھے چونکہ سوامی پر بم دھماکوں کا الزام ہے اس لیے معاملے کی تفتیش کی جانی چاہیے۔

سابق وزیر اعلی فاروق عبداللہ نے بھی یہ سوال اٹھایا تھا اور کہا تھا کہ جنرل سنہا کو سوامی دیا نند سےاپنے مبینہ تعلق کی وضاحت کرنی چاہيے۔

لفٹیننٹ جنرل سنہا نے کہا کہ وہ سوامی دیانند سے کبھی نہیں ملے اورانہوں نے ان کے بارے میں پہلی بار میڈیا میں ان کا نام آنے کے بعد جانا۔

سوامی دیانند پانڈے کا نام اتر پردیش کے بنارس شہر سے ہے ۔ گزشتہ کئی برس سے وہ جموں میں ہیں جہاں وہ ایک بڑی ہندو سادھو کے روپ میں مقبول ہیں۔

فی الوقت وہ وہ مہاراشٹر کی انسداد دہشت گردی پولیس کی حراست میں ہے۔