ریحانہ بستی والا بی بی سی اردو ڈاٹ کام ، ممبئی

	مالیگاؤں دھماکے میں عید کے لیے خریداری کرنے والے لوگ ہلاک ہوئے تھے

چھ اپریل کو ناندیڑ میں راشٹریہ سوئم سیوک سنگھ یعنی آر ایس ایس رکن لکشمن راج کونڈوار کے گھر میں بم بناتے ہوئے دو افراد موقع پر ہی ہلاک ہو گئے تھے جن میں ایک لکشمن کا بیٹا نریش اوردوسرا ہیمانشو وینکٹیش ہلاک اور دیگر چار افراد شدید زخمی ہوئے تھے۔

سی بی آئی نے نادیڑ بم دھماکے کے سلسلہ میں تفتیش کی لیکن آئی بی اے ٹی ایس کے ساتھ متوازی طور پر مالیگاؤں بم دھماکہ کی تفتیش کر رہی ہے کیونکہ اس میں اب فوج کے موجودہ کرنل کی گرفتاری عمل میں آئی ہے۔

اے ٹی ایس اعلی افسران اس پورے معاملہ میں خاموشی برت رہے ہیں۔ تاہم اے ٹی ایس کے ہی ذرائع کا کہنا ہے کہ موجودہ لیفٹینینٹ کرنل سری کانت پرساد پروہت سے تفتیش کے بعد اب مزید تین فوجی افسران شک کے گھیرے میں ہیں۔ان میں ایک کرنل مہاراشٹر کے ہی علاقے دیولالی میں پوسٹنگ پر ہیں۔ دوسرے کے بارے میں کہا جارہا ہے کہ وہ مدھیہ پردیش کے ہیں۔ ذرائع کا دعوی ہے کہ ایک سابق لیفٹینٹ جرنل بھی شک کے گھیرے میں ہیں جن سے اے ٹی ایس تفتیش کرے گی۔

بتایا جاتا ہے کہ اے ٹی ایس کی سابق میجر رمیش اپادھیائے اور کرنل پروہت سے تفتیش کے دوران ان فوجیوں کے نام سامنے آئے ہیں۔ میجر اپادھیائے اور پروہت اس وقت اے ٹی ایس کی حراست میں ہیں ان پر مالیگاؤں بم دھماکے کی سازش رچنے اور ملزمین کو بم بنانے کی تربیت دینے جیسے الزامات عائد ہیں۔

اے ٹی ایس کی ایک ٹیم اس وقت پونے، اورنگ آباد ، احمد نگر پربھنی اور ناسک ملٹی انٹلی جنس ریکارڈ کی جانچ کر رہی ہے۔ اے ٹی ایس اس بات پر نظر رکھ رہی ہے کہ کرنل پروہت جب ناسک میں ملٹری انٹیلی جنس کے لیے شدت پسندوں کی تفصیلات جمع کر رہے تھے اس وقت ان کی ملاقات فوج کے کن افسران سے ہوئی تھی اور ان کا کیا مالیگاؤں بم دھماکہ کے کسی ملزم سے تو رابطہ قائم نہیں ہوا تھا۔

اے ٹی ایس نے ملٹری ہیڈکوارٹ کو مطلع کیا ہے کہ وہ کرنل پروہت کا وہ لیپ ٹاپ تلاش کریں جو ان کی گرفتاری کے بعد ان کے کمرے سے غائب ہو چکا ہے۔اے ٹی ایس کا ماننا ہے کہ اس لیپ ٹاپ میں اہم معلومات ہوں گی جس سے کیس کو حل کرنے اور ثبوت اکٹھا کرنے میں مدد ملے گی۔