ریاض مسرور بی بی سی اُردو ڈاٹ کام، سرینگر

	پرنب مکھرجی کا کہنا ہے مولانا مسعود اظہر کو ہندوستان کے حوالے کرنے میں پاکستان ہچکچا کیوں رہا ہے

ایک پریس کانفرنس سے خطاب کرتے ہوئے انہوں نے کہا کہ ممبئی پر دہشت گردانہ حملوں سے گو کہ کشمیر کا انتخابی عمل متاثر نہیں ہوا ہے تاہم ہندوستان اور پاکستان کے درمیان چار سالہ امن عمل بقول ان کے ’pause‘ یعنی 'وقفہ' کا شکار ہے اور جب تک پاکستان اس کے یہاں موجود دہشت گرد ڈھانچہ کے خاتمہ میں پہل نہ کرے تب تک تعلقات کی بہتری ممکن نہیں ہے۔

مسٹر مکھرجی نے کہا’بھارت کو پاکستان کی طرف سے کافی یقین دہانیاں مل رہی ہیں لیکن ہم یقین دہانیوں کا نہیں پاکستان کی طرف سے وہاں موجود دہشت گردی کے ڈھانچہ کے خلاف عملی اقدامات کے منتظر ہیں۔‘

وزیردفاع نے کسی کا نام لیے بغیر دس سال قبل انڈین ائر لائنز کے آئی سی 814 کی اغواکاری کو عالمی جُرم قرار دیا اور پاکستان سے مطالبہ کیا کہ جن چالیس افراد کی فہرست اسے سونپی گئی ہے ان میں سے کچھ بھارتی شہری ہیں اور یہاں جُرم کرنے کے بعد انہوں نے پاکستان میں پناہ لے رکھی ہے۔

عملی اقدامات چاہیئں  بھارت کو پاکستان کی طرف سے کافی یقین دہانیاں مل رہی ہیں لیکن ہم یقین دہانیوں کا نہیں پاکستان کی طرف سے وہاں موجود دہشت گردی کے ڈھانچہ کے خلاف عملی اقدامات کے منتظر ہیں پرنب مکھرجی

واضح رہے کہ مذکورہ طیارے کو بعض نامعلوم مسلح افراد نے نیپال سے اغوا کر کے قندہار میں اتار دیا تھا اور مسافروں کی بحفاظت رہائی کے عوض اُس وقت کے وزیرخارجہ جسونت سنگھ نے جیش محمد کے کمانڈر مولانا مسعود اظہر اور کشمیری عسکریت پسند مشتاق زرگر سمیت پانچ عسکری کمانڈروں کو جہاز پر بٹھا کر قندہار میں رہا کیا تھا۔

مسٹر مُکھرجی نے دعویٰ کیا ہے کہ پاکستانی سرزمین پر ابھی بھی دہشت گردی کا ڈھانچہ موجود ہے۔

ان کا کہنا تھا ’پاکستان کو سابق صدر پرویز مشرف کا جنوری دو ہزار دو اور زرداری کا چوبیس ستمبر کا وعدہ نبھانا ہوگا، جس میں دونوں نے یکساں لہجہ میں کہا تھا کہ پاکستان کی سرزمین کو پڑوسیوں کے خلاف استعمال کرنے کی اجازت نہیں دی جائے گی۔‘

پاکستان کی طرف سے ناکافی ثبوت کی فراہمی کے بارے میں پوچھے گئے ایک سوال کے جواب میں مسٹر مکھرجی نے کہا’ ہم نے باقاعدہ ثبوت دیا ہے اور کئی مرتبہ دیا ہے۔‘

واضح رہے اتوار کو بھارتی وزیراعظم نے بھی جنوبی کشمیر میں ایک انتخابی ریلی سے خطاب کے دوران پاکستان کو خبردار کیا تھا اور کہا تھا کہ’ پاکستان کے ساتھ تعلقات اس وقت تک بہتر نہیں ہوسکتے جب تک دہشت گردوں کے خلاف کارروائی نہیں کی جاتی۔‘