ریاض مسرور بی بی سی اُردو ڈاٹ کام، سرینگر

	تشدد کے بعد بارہمولہ قصبہ میں تناؤ کی صورتحال

عینی شاہدین کے مطابق جیسے ہی نیشنل کانفرنس کے سیاسی اُمیدوار اپنے حمایتیوں کے ہمراہ گھر گھر مہم کے سلسلے میں سوپور کے براٹھ کلان علاقے میں پہنچے تو نامعلوم افراد نے ان پر دستی بم پھینکا جسکا نشانہ چوک گیا اور ایک دوکان کے نزدیک گر کر پھٹ گیا۔

دھماکے کے نتیجہ میں چودہ سالہ آفاق احمد ہلاک جبکہ نیشنل کانفرنس کے دو کارکن زخمی ہوگئے۔

بارہمولہ میں تعینات سینئر پولیس آفیسر آنند جین نے بم حملے میں ایک لڑکے کی ہلاکت کی تصدیق کرتے ہوئے بی بی سی کو بتایا’ دوپہر ڈیڑھ بجے سوپور میں سیاسی امیدوار پر عسکریت پسندوں نے گرینیڈ پھینکا جس میں ایک لڑکا ہلاک ہوگیا۔ لیکن قصبہ میں اب حالات نارمل ہوگئے ہیں۔‘

اُدھر بارہمولہ قصبہ میں گزشتہ جمعہ کو پولیس کی فائرنگ میں دو نوجوانوں کی ہلاکت کے بعد مسلسل ہڑتال ہے اور مقامی پولیس نے قصبہ کے تین اہم پُلوں کو سیل کردیا ہے۔

مقامی شہریوں نے بی بی سی کو بتایا’جمہ کو ہلاک ہونے والے نوجوانوں کی یاد میں آج یہاں فاتحہ خوانی کا اہتمام کیا گیا تھا، جس میں لوگوں کی شمولیت کا امکان تھا۔ حریت رہنما میرواعظ عمر فاروق نے بھی اس میں شرکت کا اعلان کیا تھا۔ لیکن آج یہاں پھر غیر اعلانیہ کرفیو نافذ کیا گیا۔‘

واضح رہے بارہمولہ میں گزشتہ جمعہ کو مظاہرین کی ایک مشتعل ٹولی نے کانگریس کے ایک امیدوار کی گاڑی کا گھیراؤ کرنے کی کوشش کی جس کے دوران امیدورا کے ذاتی محافظوں نے فائرنگ کی اور اس میں دو مقامی نوجوان منظور کُمہار اور تنویر شیخ ہلاک ہوگئے۔

جمہ کو ہلاک ہونے والے نوجوانوں کے یاد میں آج یہاں فاتحہ خوانی کا اہتمام کیا گیا تھا، جس میں لوگوں کی شمولیت کا امکان تھا۔ حریت رہنما میرواعظ عمر فاروق نے بھی اس میں شرکت کا اعلان کیا تھا۔ لیکن آج یہاں پھر غیر اعلانیہ کرفیو نافذ کیا گیا مقامی شہری

اس دوران جنوبی ضلع پلوامہ میں بھی مقامی لوگوں کی طرف سے انتخابی مہم چلا رہے سیاستدانوں پر پتھراؤ اور پولیس ایکشن کے بعد حالات کشیدہ ہیں۔

ضلع میں سوموار کو جب انتخابی مہم کے دوران مختلف پارٹیوں کے امیدوار روڈ شو کرنے لگے تو مقامی لوگوں نے پتھراؤ کیا۔ پی ڈی پی کی صدر محبوبہ مفتی ضلع کے وچی انتخابی حلقے سے نامزدگی کے کاغذات داخل کرنے کے لیے آئی تھیں، انہوں نے پرتشدد مظاہروں کے بعد عوامی ریلی ملتوی کردی۔

اس موقعہ پر مظاہرین اور پولیس کے درمیان تصادم میں کم از کم تیس افراد زخمی ہوگئے۔

مقامی لوگوں نے بتایا کہ پولیس کارروائی کے خلاف منگل کو عوامی ردعمل کے خدشے سے ضلع میں غیر اعلانیہ کرفیو نافذ کیا گیا ہے۔ مقامی پولیس افسر علی محمد کے مطابق امن و قانون کی صورتحال کو برقرار رکھنے کے لئے لوگوں سے کہا گیا ہے کہ وہ گھروں میں ہی رہیں۔