الطاف حسین، بینو جوشی بی بی سی اردو ڈاٹ کام، جموں و کشمیر

	دوسرے مرحلے میں بھی پہلے مرحلے کی طرف زیادہ ووٹنگ کی توقع ہے

پونچھ کے ڈپٹی کمیشنر نے بتایا کہ چار سو چون میں سے چھیانوے پولنگ سٹیشن انتہائی حساس قرار دیے گئے ہیں۔ انہوں نے کہا کہ ایل او سی پر کسی ممکنہ خطرے کے پیش نظر اس علاقے میں متبادل پولنگ سٹیشن بھی بنائے گئے ہیں۔ انہوں نے کہا کہ انڈیا اور پاکستان کے درمیان سن دو ہزار تین سے فائربندی ہے لیکن کوئی رسک نہیں لیا جا سکتا۔

انتخابات میں یہ بات سامنے آئی ہے کہ سیاسی مسائل پر زیادہ زور نہیں دیا جا رہا۔ زیادہ تر اقتصادی مسائل پر توجہ دی جا رہی ہے جیسے کہ عمر عبداللہ نے بجلی اور گیس کی قیمتوں میں کمی کا وعدہ کیا ہے۔ دوسری جماعتیں بھی اسی طرح کے وعدے کر رہی ہیں۔ ایک جماعت نے کہا کہ سرکاری محکموں میں چالیس ہزار آسامیوں کو پر کیا جائے گا۔ لوگ بھی انہیں باتوں پر زیادہ توجہ دے رہے ہیں۔ کئی لوگوں کا کہنا ہے کہ وہ ’تحریک آزادی‘ سے ہٹے نہیں بلکہ اپنے روز مرّہ مسائل کا بھی حل چاہتے ہیں اسی لیے وہ پولنگ میں حصہ لے رہے ہیں۔

ووٹنگ کی شرح  دوسرے مرحلے میں بھی ووٹنگ کی شرح کے حوالے سے پہلے مرحلے میں، علیحدگی پسند جماعتوں کی مخالفت کے باوجود، غیر متوقع طور پر زیادہ ووٹنگ کا اثر دیکھنے میں آئے گا لیکن حتمی طور پر کچھ کہنا مشکل ہے۔ وادی کے دونوں حلقوں کنگن اور گاندر بل میں ایسے لوگ ملتے ہیں جو بائیکاٹ کی بات کرتے ہیں۔ جمعے کے روز انتخابات کی مخالفت میں تشدد کے واقعات بھی ہوئے۔ سنیچر کو بارامولہ میں انتخابات کے خلاف مظاہرے کرنے والے دو لوگ پولیس کی فائرنگ سے مارے گئے

اسی طرح پیپلز ڈیموکریٹک پارٹی کی سربراہ محبوبہ مفتی کے انتخابی قافلے میں شامل ایک گاڑی کو نذر آتش بھی کیا گیا۔

دوسرے مرحلے کے انتخابات سے قبل علیحدگی پسند جماعتیں کہہ رہی ہیں کہ ان کے بیشتر رہنما نظربند ہیں۔ پہلے مرحلے کی ووٹنگ کے دوران سرینگر میں کرفیو جیسے حالات تھے اور رہنماؤں کو لوگوں کے پاس جانے سے روکا جا رہا ہے۔

غیر جانبدار سمجھے جانے والے مبصرین کا کہنا ہے کہ پہلے مرحلے میں زیادہ ووٹنگ کا یہ مطلب نہیں کہ لوگ ’تحریک آزادی‘ سے ہٹ گئے تھے بلکہ وہ اس عمل میں شریک ہو کر اس بات کو یقینی بنا رہے ہیں کہ روز مرہ معمولات چلانے کے لیے ان کی مرضی کے لوگ ہوں۔

راجوڑی
راجوڑی کے حلقوں میں انتخابی جوش و خروش ہے اور اس کی ایک بڑی وجہ امیدواروں کی تعداد ہے۔ علیحدگی پسند تنظیموں کی طرف انتخابی بائیکاٹ کی اپیل کا امکان کم نظر آ رہا ہے۔ راجوڑی میں پہاڑوں کی اونچایوں پر لوگ رہتے ہیں لیکن ان کا یہی کہنا ہے کہ وہ ووٹ ڈالیں گے۔ ووٹوں کی زیادہ شرح میں ذات برادری کی بنیاد پر سیاست کا بھی ہاتھ ہے کیونکہ لوگ چاہتے ہیں ان کی برادری کو کامیابی حاصل ہو۔

اس کے علاوہ راجوڑی ایک پہاڑی ضلع ہے جہاں بہت سے پسماندہ علاقے ہیں۔ یہاں بیروزگاری ہے بنیادی سہولتوں کا فقدان ہے اور سیاستدان اس پر بات بھی کر رہے ہیں لیکن ذات برداری کی سیاست کا یہاں گہرا اثر ہے۔

راجوڑی کے چاروں حلقوں میں کہیں پر بھی کسی ایک جماعت کا پلڑا بھاری نہیں ہے۔ سن دو ہزار دو میں بھی راجوڑی میں مختلف جماعتوں کو کامیابی حاصل ہوئی تھی اور اس بار بھی ویسی ہی صورتحال ہے۔