نادیہ پرویز بی بی سی اردو ڈاٹ کام، دلی

	سیکریٹری جنرل بان کیمون دو روزہ دورے پر ہندوستان میں ہیں

دلی میں واقع اقوام متحدہ کے دفتر میں سیکریٹری جنرل بان کیمون نے ذرائع ابلاغ سے اپنے خطاب کے دوران جمعرات کو آسام میں ہونے والے دھماکوں کی مذمت کی اور ماحولیات میں آ رہی تبدیلی اور چندر یان ون کا تجربہ سمیت کئی موضوعات پر بات چیت کی۔

سوال جواب کے دوران جب ان سے ہندوستان اور پاکستان کے درمیان تعلقات سے متعلق سوال پوچھا گیا تو انہوں نے دونوں ممالک کے درمیان تعلقات بہتر کرنے کے لیے کیے گئے حالیہ اقدامات پر اطمینان ظاہر کرتے ہوئے کہا: ’پاکستان خطے کا ایک اہم ملک ہے اور پڑوسی ممالک کو اس کی مدد کرنی چاہیے تاکہ وہ محفوظ ہونے کا احساس کر سکے اور وہاں سماجی اور اقتصادی ترقی لائی جا سکے۔‘

ان کا مزید کہنا تھا: ’میں پرامید ہوں کہ دونوں ممالک کے رہنما اس سمت میں آگے بڑھ رہے ہیں، حال ہی میں شروع کی گئی دونوں ممالک کے درمیان تجارت اس مسئلے میں ایک اہم قدم ہے۔ میں امید کرتا ہوں کہ انڈیا کی جانب سے شروع کیے گئے کمپوزٹ ڈائلوگز اور اس قسم کے اہم اقدامات سے ہميں بہتر نتائج ملتے رہيں گے۔‘

	کشمیری پنڈتوں نے خاموش احتجاج کیا

کشمیری پنڈتوں کا خاموش جلوس
جہاں بان کیمون صحافیوں سے بات کر رہے تھے وہیں اس مقام سے چند کلومیٹر دور کشمیر سے بے گھر ہوئے کشمیری پنٹدتوں کی بعض تنظیموں کے نمائندوں نے ایک خاموش جلوس نکالا اور کشمیری پنڈتوں کو اندرون پناہ گزین کا درجہ دیے جانے کا مطالبہ کیا۔

کشمیری پنڈتوں نے اپنی برادری کے لوگوں کے قتل عام کے معاملات کی جانچ کرائے جانے کے لیے تحقیقاتی کمیشن قائم کرنے کا بھی مطالبہ کیا۔

وہ یہ مطالبہ بھی کر رہے تھے کشمیر میں مقیم کشمیری پنڈتوں کو حفاظت فراہم کی جائے اور کشمیر میں واقع ہندو مذہبی مراکز ہندوؤں کو سونپ دیے جائیں۔

ہندوستان کے زیرِانتظام جموں کشمیر میں 1989 میں مسلح جد و جہد کے آغاز کے ساتھ ہی اقلیتی ہندو فرقے سے تعلق رکھنے والے کشمیری پنڈتوں کی ہجرت کا سلسلہ بھی شرع ہوا۔

اس وقت ایک بڑی تعداد میں کشمیری پنڈت جموں، دلی اور دیگر مقامات پر مقیم ہیں۔ ان کا الزام ہے کہ حکومت نے ان کی آبادکاری کے لیے مناسب اقدامات نہيں کیے ہیں۔