الیکشن کے اعلان کے بعد سے سکیورٹی مزید سخت کر دی گئی ہے

یہ واقعہ ضلع کشتواڑ کے پہاڑی علاقے میں پیش آیا۔

فوج کے ایک ترجمان کا کہنا ہے کہ ضلع کشتواڑ کے پہاڑی علاقے میں بعض شدت پسندوں کے موجود ہونے کا پتہ چلا تھا جن کی تلاش کے لیے فوج نے علاقے کا محاصرہ کر لیا اور تبھی مڈبھیڑ شروع ہوئی۔

ترجمان نے بی بی سی کو بتایا کہ ’مڈبھیڑ میں پانچ شدت پسند ہلاک ہوئے ہیں اور ان کی شناخت حزب المجاہدین کے کارکنان کے طور پر ہوئی ہے، اس آپریشن میں فوج کا کوئی نقصان نہیں ہوا ہے۔‘ آخری اطلاعات ملنے تک مڈبھیڑ جاری تھی۔

ترجمان کا کہنا تھا کہ ’ آنے والے انتخابات کے تناظر میں یہ آپریشن ایک بڑی کامیابی ہے، اسی گروپ نے کشتواڑ کی ایک مسجد اور علاقے میں ایسے پوسٹرز چسپاں کیے تھے جس میں لوگوں سے انتخابات کے بائیکاٹ کی اپیل کی گئی ہے۔‘

فوج نے علاقے میں محاصرے کا دائرہ مزید وسیع کردیا ہے اور تلاش جاری ہے کہ کہیں علاقے میں مزید شدت پسند تو نہیں چھپے ہیں۔