صلاح الدین، نارائن باریٹھ بی بی سی اردو ڈاٹ کام، جے پور

	کرفیو سے فرقہ وارانہ کشیدگی کو روکنے میں مدد ملی ہے

پولیس حکام کے مطابق جن جگہوں پر دھماکے ہوئے ہیں وہاں ہندوؤں اور مسلمانوں کی ملی جلی آبادی ہے اور کسی ناخوشگوار صورتحال سے بچنے کے لیے کرفیو کا نفاذ عمل میں لایا گیا ہے۔ منگل کی شام ہونے والے ان دھماکوں میں تریسٹھ افراد ہلاک ہو گئے تھے۔ حکام کے مطابق کرفیو جے پور کے پندرہ تھانوں کی حدود میں نافذ رہے گا۔

جے پور: دھماکوں کے بعد کی صبح

جے پور دھماکوں کی پرزور مذمت

جے پور میں دھماکے، تصاویر میں

انڈیا: دھماکوں کی تاریخ

بدھ کی صبح بڑی تعداد میں شہریوں نے متاثرہ مقامات کی جانب جانے کی کوشش کی تو پولیس حکام نے لاؤڈسپیکرز کے ذریعے انہیں واپس جانے کو کہا اور مطلع کیا کہ علاقے میں کرفیو نافذ ہے اس لیے لوگ اپنے گھروں کو واپس چلے جائیں۔

ان اعلانات کے بعد سکیورٹی اداروں کے جوانوں نے متاثرہ علاقوں کی طرف جانے والے راستوں پر رکاوٹیں کھڑی کر دیں جس کے بعد صرف متعلقہ حکام کو ان علاقوں تک رسائی کی اجازت ہے۔

ادھر منگل کی شام ہونے والے سات سلسلہ وار بم دھماکوں کے بعد جے پور شہر میں سکیورٹی سخت کر دی گئی ہے اور شہر کے مختلف علاقوں میں پولیس اور ریپڈ ایکشن فورس کے جوان تعینات ہیں۔ یاد رہے کہ دھماکوں کے فوراً بعد ریاستی حکام کی درخواست پر مرکزی حکومت نے ’ریپڈ ایکشن فورس‘ کی دو کمپنیاں جے پور بھیج دی تھیں۔

	متاثرہ علاقوں تک صرف متعلقہ حکام کو رسائی ہے

تاحال کسی گروہ یا تنظیم کی جانب سے ان دھماکوں کی ذمہ داری قبول نہیں کی گئی ہے اور پولیس حکام کا بھی کہنا ہے کہ اس بارے میں ابھی کچھ کہنا قبل از وقت ہو گا۔ منگل کو رات گئے بی بی سی اردو سے بات کرتے ہوئے راجستھان کے آئی جی کہنیا لال نے کہا کہ تاحال یہ کہنا مشکل ہے کہ یہ کس گروہ کا کام ہے اور اس حوالے سے تفتیش جاری ہے۔

مرکزی وزیر مملکت برائے داخلہ شری پرکاش جیسوال نے ان دھماکوں کو ایک بڑی سازش قرار دیا ہے جبکہ بھارتی وزیرِاعظم من موہن سنگھ نے لوگوں سے پرامن رہنے کی اپیل کی ہے۔ کانگریس کی رہنما سونیا گاندھی اور دیگر کئی رہنماؤں نے ان دھماکوں کی مذمت بھی کی ہے۔

ریاست کی وزیراعلی وجے راجے سندھیا دھماکے میں ہلاک ہونے والے افراد کے لواحقین کو پانچ پانچ لاکھ روپے جبکہ زخمیوں کوایک ایک لاکھ روپے بطور معاوضہ دینے کا اعلان کیا ہے۔

جے پور جسے’گلابی شہر‘ کے نام سے بھی جانا جاتا ہے بھارتی ریاست راجستھان کا اہم سیاحتی مقام ہے جہاں دنیا بھر سے سیاح آتے ہیں۔ یہ پہلا موقع نہیں کہ ریاست راجستھان میں بم دھماکوں کا واقعہ پیش آیا ہو اور اس سے قبل ریاست میں گزشتہ برس اکتوبر میں اجمیر میں واقع خواجہ معین الدین چشتی کی درگاہ میں دو دھماکے ہوئے تھے جس میں دو افراد ہلاک اور چودہ زخمی ہوئے تھے۔