وزیرِ مملکت برائے داخلہ شری پرکاش جیسوال نے ان دھماکوں کو ایک بڑی سازش قرار دیاہے۔

خبررساں ایجنیسی پی ٹی آئی کا کہنا ہے کہ ریاست کی وزیر اعلیٰ وجے راجے سندھیا کےمطابق ساٹھ افراد ہلاک اور ایک سو پچاس افراد زخمی ہوئے ہيں۔

ریاست کی وزیر اعلی نے لواحقین کے ورثاء کو پانچ پانچ لاکھ روپے جبکہ زخیموں کوایک ایک لاکھ روپے بطور معاوضہ دینے کا اعلان کیا ہے۔

پولیس کے ایک اعلیٰ افسر نے ان دھاکوں کو دہشتگری کی کارروائی قرار دیا ہے تاہم فوری طور پر یہ واضح نہیں کہ ان دھماکوں کے پیچھے کون ہے۔

بھارتی وزیرِ اعظم من موہن سنگھ نے لوگوں سے پرامن رہنے کی اپیل کی ہے جبکہ کانگریس کی رہنما سونیا گاندھی اور دیگر کئی رہنماؤں نے ان دھماکوں کی مذمت کی ہے۔

دھماکے مانس چوک، بڑی چوپال، چھوٹی چوپال، جوہری بازار اور ترپیولیا بازار میں ہوئے ہيں۔یہ بہت پرہجوم علاقہ ہے اور یہاں بڑی تعداد ميں مقامی لوگ اور سیاح خریداری کے لیے آتے ہیں۔

ابتدائی اطلاعات کے مطابق دھماکہ خیز مواد گاڑیوں اور دکانوں میں رکھا گیا تھا جو ایسے مقامات پر پھٹا جو تاریخی اعتبار سے بڑی اہمیت کے حامل سمجھے جاتے ہیں۔ ایک دھماکہ ’ہوا محل‘ کے قریب ہوا۔ ہنو مان مندر کے پاس بھی ایک دھماکہ ہوا جہاں منگل کا دن ہونے کی وجہ سے بہت بھیڑ تھی۔

دھماکوں کے بعد علاقے میں بھگدڑ مچ گئی۔ دھماکے مقامی وقت کے مطابق تقریبا ساڑھے سات بجے ہوئے۔

وزیرِ مملکت برائے داخلہ شری پرکاش جیسوال نے ان دھماکوں کو ایک بڑی سازش قرار دیاہے۔

ڈپٹی انسپکٹر جنرل آف پولیس اے ایس گل کے مطابق شہر میں بعض زندہ بم بھی ملے ہیں جنہيں ناکارہ بنانے کی کوشش کی جا رہی ہے۔

مرکزی وزیر مملکت برائے داخلہ شری پرکاش جیسوال کے مطابق دلی، ممبئی سمیت سبھی بڑے شہروں میں ہائی الرٹ جاری کردیا گيا ہے۔

واضح رہے کہ دھماکوں کے وقت ریاست کی وزیر اعلی وجے راجے سندھیا جودھ پور کے سفر پر تھیں اور اطلاع ملتے ہی جے پور لوٹ گئی ہیں۔انہوں نے وزیر اعظم منموہن سنگھ اور وزیر داخلہ شِو راج پاٹل سے بات کی ہے۔