نادیہ پرویز بی بی سی اردو ڈاٹ کام، دلی

بھارتی اخبارات ميں ہلاک ہونے والوں کی تعداد 60 سے 100 تک بتائی گئی ہے

انگریزی کے روزنامے دا ٹائمز آف انڈیا نے ’اب جےپور‘ سرخی دی ہے۔ اس کے علاوہ اخبار نے گزشتہ برسوں میں منگل کو ہونے والے بم دھماکو کی فہرست شائع کرتے ہوئے بتایا ہے کہ اس سے قبل یکم جنوری 2008 کو رام پور میں 11 جولائی 2006 کو ممبئی میں ، سات مارچ 2006 کو بنارس میں اور پانچ جولائی 2006 کو ایودھیہ میں منگل کو ہی بم دھماکے ہوئے تھے۔ اخبار نے ان دھماکوں کو مہاراشٹر کے مالے گاؤں میں ہونے والے بم دھماکوں کی طرز پر بتایا ہے۔

اردو کے اخبار ہندوستان ایکسپریس نے لکھا ہے ’ بم دھماکوں سے شہر دہل گیا‘۔ اخبار نے اپنے صفحہ اول پر جو تصاویر شائع کیں ہیں ان میں ایک شخص کی شرٹ بری طرح خون ميں ڈوبی ہوئی ہے جبکہ دوسرا شخص زخمی حالات میں اپنے ہی ہاتھ میں گلوکوز کی بوتل لیے ہوئے کھڑا ہوا ہے۔

انگریزی کے اخبار انڈین ایکسپریس نے تقریباً آدھے صفحہ پر متاثرہ افراد کی تصاویر شائع کیں ہیں جس میں ایک اس رکشے والے کی تصویر ہے جس کی موت دھماکے کے وقت ہو گئی تھی جبکہ دوسری تصویر ميں ایک خاتون اور ایک نوجوان دھماکوں کے بعد دہشت میں ہیں۔ اخبار نے اس بات کا بھی جائزہ لیا ہے کہ کس طرح آج کل بم دھماکے منگل کو مندر میں اور جمعہ کو مسجد میں ہو رہے ہیں۔

اخبار نے یہ بتایا ہے کہ ریاستی اور مرکزي دونوں حکومتوں کے لیے یہ ایک دھچکہ تھا کیوں کہ جے پور کبھی بھی دہشتگردی کے ممکنہ ٹھکانوں میں نہیں تھا۔

انگریزی کے ایک اور اخبار ’دی پائنئر‘ نے ان دھماکوں کے پیچھے حرکت الجہاد الاسلام کا ہاتھ ہونے کا اندیشہ ظاہر کیا ہے۔

اخبار کہتا ہے:  اخبار نے اس بات کا بھی جائزہ لیا ہے کہ کس طرح آج کل بم دھماکے منگل کو مندر میں اور جمعہ کو مسجد میں ہو رہے ہیں۔ اخبار نے یہ بتایا ہے کہ ریاستی اور مرکزي دونوں حکومتوں کے لیے یہ ایک دھچکہ تھا کیوں کہ جے پور کبھی بھی دہشتگردانہ الرٹ کے دائرے میں نہیں تھا۔ انڈین ایکسپریس

وہیں ہندوستان ٹائمز نےخبر شائع کی ہے کہ ان دھماکوں میں کم شدت والے مادے کا استعمال کیاگیا ہے جس میں امونیم نائٹریٹ یا آر ڈی ایکس جیسے مادے کا استعمال کیا گیا۔ اخبار نے یہ یہ خدشہ ظاہر کیا ہے کہ دھماکوں میں ٹریگرز اور ڈیٹونیٹر بھی استعمال کیے گئے تھے۔ وہیں اخبار نے یہ بھی واضح کر دیا ہے کہ ان میں حرکت الجہاد الاسلام اور لشکر طیبہ کا ہاتھ ہو سکتا ہے حبکہ اس سوال کے جواب میں کہ جے پور ہی کیوں؟ اخبار نے لکھا ہے کہ یہاں کافی تعداد میں ملک اور غیر ملکی سیاح آتے ہیں اور ان حالات میں بین الاقوامی سطح پر توجہ ملتی ہے۔