وزیر دفاع کےمطابق تشدد تو کم ہوا، لیکن دراندازی بدستور جاری ہے۔

جنوبی بھارت کے شہر کوچی میں صحافیوں سے بات چیت کے دوران وزیر دفاع نے کہا کہ تشدد میں کمی تو آئی ہے لیکن گزشتہ تین برسوں کی جنگ بندی کے باوجود سرحد پار سے جاری ملیٹنسی تشویش کا سبب ہے۔

شدت پسند اب بھی سرحد پار سے آرہے ہیں اور انہیں ادھر سے حمایت بھی مل رہی ہے بھارتی وزیر دفاع

مسٹر انٹنی کا کہنا تھا کہ: ’پاکستان اور چین کے ساتھ ہم کوئی ٹکراؤ نہیں چاہتے اور ہم تمام مسائل کو پر امن طور پر حل کرنے کی کوشش کر رہے ہیں لیکن اس کام میں پریشانیاں تو ہیں۔‘

مسٹر اینٹنی بحریہ کی ایک تقریب میں حصہ لینے کے لیے کوچی گئے تھے۔

	چین کے ساتھ سرحدی تنازع کے حل میں کوئی پیش رفت نہیں ہوسکی ہے۔

چین کے ساتھ سرحدی تنازعہ پر ایک سوال کے جواب میں انہوں نے کہا کہ اس کے حل کے لیے تمام کوششیں ہورہی ہیں اور چین اور بھارت کے خصوصی نمائندے اس سلسلے میں اب تک بات چیت کے گیارہ دور مکمل کر چکے ہیں۔

’اگر کچھ سنگین قسم کی بات ہوتی ہے تو دونوں جانب کی بارڈر سکیورٹی فورسز کے افسران آپس میں یا سفارتی سطح پر حل کرلیتے ہیں۔‘

ہندوستان اور چین کے درمیان سرحد کو لیکر اختلافات ہیں۔ مسٹر اینٹنی کا کہنا تھا ’سرحد کے متعلق ایک نظریہ ہمارا ہے اور دوسرا چین کا، ہم یہ مانتے ہیں کہ پورا اروناچل پردیش ہمارا ہے لیکن چین کو اس پر اعتراض ہے۔‘

دونوں ملک سرحدی تنازعہ کے حل کے لیے کافی دنوں سے بات چیت کر رہے ہیں لیکن خاص پیش رفت نہیں ہوئی ہے۔