ریاض مسرور بی بی سی اُردو ڈاٹ کام، سرینگر

	کشمیر سیب اپنے ذائقے اور خوشبو کے اعتبار سے مشہور ہے

باغبانی کے ریاستی وزیر محمد دلاور میر اعتراف کرتے ہیں کہ پچھلے تیس سال کے دوران یہاں کی مختلف حکومتیں میوہ خاص طور پر سیب کو ’انٹرنیشنل برانڈ‘ بنانے میں ناکام ہوئی ہیں۔

تاہم ان کا خیال ہے کہ ان کی مخلوط سرکار نے اس سلسلے میں ایک جامع پالیسی ترتیب دی ہے جس کے ثمرات آئندہ چند سال میں نمایاں ہوجائیں گے۔

لیکن میوہ تجارت سے متعلق حلقے کہتے ہیں کہ ریاست کی بے روزگاری کو ختم کرنے اور ریاستی خزانہ کے لئے ’ریڑھ کی ہڈی‘ کا درجہ رکھنے والی میوہ صنعت کے ساتھ حکومت ’سوتیلی ماں‘ کا سلوک کر رہی ہے ۔

	حاجی بیشر بیگ نے کہا کہ کشمیر میں میوہ کی کاشت انتہائی منافع بخش ہے

باغبانوں اور میوہ تاجروں کی انجمن ’فروٹ گروورز ایسوسی ایشن‘ کے صدر حاجی بشیر احمد بیگ نے بی بی سی کے ساتھ گفتگو کے دوران بتایا کہ ’ہر سیزن کے دوران اسی منڈی میں روزانہ اڑھائی کروڑ مالیت کا میوہ بکتا ہے۔ لیکن پچھلے بیس سال میں حکومت نے اس منڈی کی سڑکیں تعمیر کیں نہ بیت الخلا بنائے۔ حکومت نے ہارٹیکلچر پلاننگ اینڈ مارکیٹنگ کا ادارہ قائم کیا ہے، لیکن ہمیں اس کا کوئی فائدہ نہیں۔‘

مسٹر بیگ کا کہنا ہے کہ ایک مقامی ہوٹل میں سات سال قبل آگ کی واردات میں دلّی اور دیگر ریاستوں کے سولہ خریدار زندہ جل گئے تھے۔ اس کے بعد حکومت نےمنڈی میں جو ہوسٹل تعیمیر کروایا اس پر ایک سرکاری محکمہ نے قبضہ جما لیا۔‘

انڈیا کے مرکزی وزیر برائے تجارت نے گزشتہ ماہ سرینگر کے نواح میں ایک ’انٹرنیشنل ٹریڈ سینٹر‘ قائم کرنے کا اعلان کیا جبکہ باغبانی کے مقامی وزیر محمد دلاور میر نے گزشتہ دنوں سوپور منڈی میں ایک کولڈ سٹوریج پلانٹ کی تعمیر کا اعلان کیا۔

لیکن میوہ تاجران اعلانات سے زیادہ مطمئن نظر نہیں آتے۔ کاشتکاروں کی نمائندگی کرنے والے مسٹر بیگ کا خیال ہے کہ ان اقدامات سے میوہ صنعت خبروں میں ضرور آئے گی لیکن عملی طور پر فائدہ نہیں ہوگا۔

	حکومت کی سرپرستی سیب کی برآمد میں اضافہ ہو سکتا ہے

مسٹر بیگ نے مزید بتایا کہ عالمی سطح پر آزادانہ تجارت کا تصور متعارف ہوجانے کے بعد جب ہندوستان بھی اس عمل کا حصہ بن گیا تو کشمیری سیب براہ راست امریکہ ، چیلی، چین اور آسٹریلیا کے مقابلے میں آگیا۔ ان کا کہنا ہے کہ ، ’ہمارا سیب لذت کے اعتبار سے دنیا میں ابھی بھی نمبر ون ہے، لیکن آج کی دُنیا میں پیکیجنگ دلکش ہونی چاہیے، اور اس کے لئے سرکاری معاونت ضروری ہے۔‘

حکومت نے اس ضرورت کا احساس کرتے ہوئے ریلائنس لمیٹڈ کے بنائے ہوئی جدید طرز کی دس لاکھ پیٹیاں یا بکسے ذخیرہ کئے ہیں لیکن مقامی کاشتکاروں کا کہنا ہے ان کی قیمت بہت زیادہ ہے۔

	جی ایم خان بھی حکومتی بے توجہی سے خوش نہیں ہیں

ایک اعلیٰ سرکاری افسر نے بتایا کہ کاشتکاروں کے ان خدشات کو دور کرنے کے لئے حکومت نے سو کروڑ روپے کا سرمایہ خرچ کرنے کا منصوبہ بنایا ہے جبکہ جموں کشمیر بنک نے حال ہی میں اپنی نوعیت کے پہلے اقدام کے طور ’ایپل انشورنش‘ متعارف کروایا ہے۔ بینک کے چیئرمین نے باغبانی کے شعبہ میں آٹھ سو کروڑ روپے کی سرمایہ کاری کرنے کا اعلان بھی کیا ہے۔

قابل ذکر ہے کہ کشمیر میں اب امریکہ، آسٹریلیا اور دیگر ممالک کے سیب بھی بکتے ہیں، جس کے باعث کشمیری سیب کے لئے مقابلے کی کیفیت پیدا ہوگئی ہے۔

ایسے میں کشمیری سیب اپنی سبقت کیسے بنائے رکھے گا؟ اس سوال کے جواب میں مسٹر بیگ کہتے ہیں کہ حکومت چاہے تو کوئی بھی صنعت ترقی کرے گی۔ ان کا کہنا ہے کہ، ’جو بھی غیر ملکی کاشتکاروں اور تاجروں کے لئے ہندوستان تک کی ٹرانسپورٹیشن دستیاب رکھی گئی ہے، جبکہ بنگلہ دیش جہاں کسی بھی ملک کے میوہ پر ٹیکس نہیں لگتا، ہمیں دس لاکھ مالیت کے ایک ٹرک پر پونے تین لاکھ روپے ٹیکس ادا کرنا پڑتا ہے۔‘

	سیبوں کو ذخیرہ کرنے کے لیے کولڈ اسٹورج بھی بنوایا جا رہا ہے

مسٹر شاہ کا کہنا ہے کہ ،'مظفرآباد روڑ نہ صرف کشمیر کو پاکستان اور وسط ایشیا کے دیگر ممالک کے ساتھ ملاتا ہے بلکہ سرینگر سے کلکتہ کا سفر سرینگر سے قندھار تک کے سفر جیسا ہے۔‘ لیکن انہیں اس حوالےسے حکومت کی جانب سے تعاون کی بہت کم امید ہے کیونکہ بقول ان کے پچھلے دو سال سے پاکستان کے زیرانتظام کشمیر کے تاجروں کے وفد کو بھارت کے زیر انتظام کشمیر آنے کی اجازت نہیں دی جارہی ہے۔