شکیل اختر
بی بی سی اردو ڈاٹ کام، دلی |  |
| | | ترقی کے عمل میں مسلمان پیچھے چھوٹ گئے ہیں |
ہندوستان گزشتہ ساٹھ برسوں کی جدو جہد کے بعد اقتصادی ترقی کی بڑی منزلیں طے کر رہا ہے۔ یہ اندازہ لگایا جا رہا ہے کہ آنے والے برسوں میں اس کا شمار دنیا کی بڑی معیشتوں میں ہوگا۔ لیکن ترقی کے اس عمل میں ہندوستان کے مسلمان کہیں پیچھے چھوٹ گئے ہیں۔ ہندوستان کی ترقی اور جدید ہندوستان میں مسلمانوں کی حصہ داری نہ کے برابر ہے۔ انسٹی ٹیوٹ آف آبجیکٹیواسٹڈیز کے سربراہ ڈاکٹر منظور عالم کہتے ہیں کہ ملک کی سیاسی قیادت نے مسلمانوں کو سب سے زیادہ نقصان پہنچایا ہے۔’مسلمانوں کی سیاسی قیادت اپنی سیاسی جماعت کی تابع رہی ہے اور وہ کوئی بھی فیصلہ اپنے آقاؤں کی اجازت کے بغیر نہيں کر سکتی تھی۔ سیاسی جماعتوں اور بیوروکریسی کا رویہ مسلمانوں کے تئیں اچھا نہیں رہا ہے۔‘ لیکن نئی نسل کے بہت سے لوگ مسلمانوں کی پسماندگی کے لیے مذہبی رہنماؤں کو بھی ذمہ دار مانتے ہیں۔ ان کا کہنا ہے کہ ان رہنماؤں نے مسلمانوں کو جدید تعلم سے دور رکھاہے۔ اقلیتی امور کے ماہر ڈاکٹر امتیاز احمد کہتے ہیں کہ مسلمانوں کی پسماندگی کے کئی اور بھی اسباب ہیں۔ ’مسلمان جن برادریوں سے آتے ہیں اس نے ان کا روایتی اور موروثی پیشہ برقرار رکھا۔ ساتھ ہی مذہبی رہنماؤں کے زیراثر برادری میں جدید تعلیم کو نظر انداز کیا گیا۔‘ | ترقی کی رفتار بہت سست ہے  تمام مشکلوں کے باوجود مسلم اب رفتہ رفتہ اپنی جگہ بنانے کی کوشش کر رہے ہیں۔ مسلمانوں کا ایک طبقہ ترقی کر رہا ہے وہ اب تعلیم کی طرف راغب ہو رہے ہیں لیکن پسماندگی کا بوجھ اتنا زیادہ ہے کہ ترقی کی رفتار بہت سست لگتی ہے۔  ڈاکٹر امتیاز احمد |
مسلم نوجوانوں کی ایک نئی نسل اب آگے آرہی ہے اور ترقی کے عمل میں پیش پیش ہے۔ چوبیس سالہ محمد شیراز نے کمپیوٹر اپلیکیشن میں ماسٹرز کر رکھا ہے اور وہ ایک نجی امریکی کمپنی میں کام کرتے ہیں۔ ’آپ اگر اچھا کام کر رہے ہیں تو آپ کو پورا موقع ملتا ہے۔ آج کے دور ميں کوئی یہ نہیں پوچھتا کہ آپ مسلمان ہیں کہ ہندو، ہو سکتا ہے کہ پہلے پوچھتے ہوں۔‘ پچیس برس کے انس خان کا تعلق مغربی اتر پردیش سے ہے۔ موروثی ذریعہ معاش زراعت رہا ہے لیکن آج وہ انہی کھیتوں میں بائیو فارمنگ اور دوسرے تجارتی طریقے کی کھیتی کی تیاریاں کر رہے ہیں۔ ’آج ہم اکیسویں صدی میں ہیں، میں تجربات کرنا چاہتا ہوں جو نئی نسل اور نئے دور کے ہیں۔‘ انس کا کہنا ہے کہ مسلمانوں کو اپنی پسماندگی سے نکلنے کے لیےاپنے فیصلے خود کرنے ہوں گے۔’مذہبی رہنماؤں نے مسلمانوں کو جدید دور کے تقاضوں سے دور رکھا ہے۔ اس حقیقت کو تسلیم کرنا چاہیے کہ دنیا پہلے ہے اور دین بعد میں۔‘ مسلمانوں کی تعلیمی اور اقتصادی پسماندگی کے باوجود بیشتر تجزیہ کار مانتےہیں کہ مسلمانوں کا ایک طبقہ رفتہ رفتہ آگے بڑ ھ رہا ہے۔ ڈاکٹر منظور عالم کا کہنا ہے کہ ’نئے ہندوستان میں مسلمانوں کا مستقبل بہتر ہوگا۔‘ ہندوستان کی ترقی کے امکانامت کے بارے میں ماہرین کہتے ہیں کہ اگر ترقی کی موجودہ رفتار برقرار رہی ہے تو وہ آئندہ بیس برسوں میں امریکہ کی معیشت کو بھی پیچھے چھوڑ دے گا۔ لیکن آج اسی ہندوستان میں تقریبا چودہ کروڑ مسلمانوں کو ملک کا ’نیا دلت‘ (پسماندہ ذات) قرار دیا جا رہا ہے ۔ تعلیم، صحت اور معیشت میں وہ سبھی برادریوں سے پیچھے ہیں اور حکومت انہیں اوپر لانے کے لیے ہنگامی تعلیمی اور اقتصادی منصوبے بنا رہی ہے۔ | 
’آئین مذہبی آزادی کو تحفظ دیتا ہے‘
