لوگوں کی فی کس آمدنی ابھی بھی صرف 31000 روپے سالانہ ہے

بی بی سی کے ساتھ ایک انٹرویو میں ہندوستان کے وزیر خزانہ پی چدامبرم نے کہا ہے تیزی سے غربت ختم ہونے کی وجہ ملک کی تیز معاشی نمو ہے۔

پی چدمبرم نے یہ بھی کہا کہ ملک کی کل آبادی کے پچیس فیصد افراد اب بھی غربت کی زندگی بسر کر رہے ہیں ملک کے پچیس کروڑ افراد کی فی کس آمدنی تقریبا 45 روپے روزانہ ہے۔

بی بی ورلڈ سروس کے پروگرام نیوز آور میں ایک انٹرویو میں پی چدمبرم نے کہا’جتنی تیزی سے ملک کی معیشت بڑھے گی اتنی ہی تیزی سےغربت کم ہوگی اور دوہزار چالیس تک ملک سے غربت پوری طرح ختم ہوجائے گی‘۔

وزیر خزانہ کا کہنا تھا کہ گزشتہ کچھ برسوں میں ملک کی بڑھتی ہوئی معیشت کے سبب ملک کے امیر ترین اور غریب عوام کے درمیان کا ’گیپ‘ یا دوری کم ہوئی ہے۔

تاہم ملک میں لوگوں کی فی کس سالانہ آمدنی ابھی بھی صرف 31000 روپے ہے۔

ان کا یہ بھی کہنا تھا کہ غربت کی زندگی گزارنے والے افراد کے حالات پہلے سے بہتر ہوئے ہیں۔

ہندوستان ایک عالمی اقتصادی طاقت بن چکا ہے۔ گزشتہ تین برسوں سے ہندوستان کی معیشت سالانہ 8 فیصد کی رفتار سے بڑھ رہی ہے اور ہندوستان جلد ہی اقتصادی ترقی کے حوالے سے چین کے برابر کھڑا ہوسکتا ہے۔