عبدالواحد آزاد بی بی سی اردو ڈاٹ کام، دلی

	’مزدروں کو قانونی حقوق ملنے چاہیے تاکہ جب ان کے ساتھ ناانصافی ہو تو وہ قانوی چارہ جوئی کرسکیں‘

ایک حالیہ رپورٹ کے مطابق یہ مزدور انتہائی غیر انسانی حالت میں زندگی گزار رہے ہیں تاہم اب حکومت نے غیر منظم سیکٹر کے مزدروں کی بہتری اور انہیں استحصال سے بچانے کے لیے پارلیمنٹ میں ایک بل پیش کیا ہے۔

اس مجوزہ بل کے تحت ایک قومی سماجی سکیورٹی بورڈ بنایا جائے گا جو غیر منظم سیکٹر میں کام کرنے والے مختلف سطح کے مزدروں کےلیے سکیم کی سفارش کرے گا۔ بل میں زرعی اور غیر زرعی سیکٹر میں کوئی تفریق نہیں کی گئی ہے۔

جواہر لعل یونیورسٹی کے پروفیسر دیپانکر گپتا نے منظم سیکٹر کا مطالعہ کیا ہے۔ ان کا کہنا ہے کہ’ملک میں صرف اسی سیکٹر میں ملازمتیں بڑھ رہی ہیں کیونکہ یہاں اجرتوں پر کوئی کنٹرول نہیں ہے اور مالکان اپنی مرضی سے مزدروں کا جتنا استحصال کرسکتے ہیں، وہ کر رہے ہیں‘۔

ملک میں صرف اسی سیکٹر میں ملازمتیں بڑھ رہی ہیں کیونکہ یہاں اجرتوں پر کوئی کنٹرول نہیں ہے اور مالکان اپنی مرضی سے مزدروں کا جتنا استحصال کرسکتے ہیں، وہ کر رہے ہیں پروفیسر دیپانکر گپتا

وزارت خزانہ پہلے ہی اس سکیم کے لیے ایک ہزار کروڑ روپیے مختص کرنے کا عندیہ دے چکی ہے۔ مزدور لیڈر اور بایاں محاذ مجوزہ اقدامات کو ناکافی قرار دے رہے ہیں۔ ان کا کہنا ہےکہ ان اقدامات سے مزدروں کو صحیح معنی میں کوئی ٹھوس فائدے نہیں پہنچے گا۔

مارکسی کمیونسٹ پارٹی کے رہنمامحمد سلیم نےبی بی سی کو بتایا:’حکومت کی جانب سے پیش کیاگيا بل کھوکھلا ہے اور اس کا نفاذ ممکن نہیں۔ بل میں یہ بات واضح کی جانی چاہیے کہ سکیموں کے لیے وسائل کہاں سے لائے جائیں گے اور وہ عوام تک کس ذریعے سے پہنچیں گے‘۔

ان کا مزيد کہنا تھا کہ مزدروں کے حقوق کی خلاف ورزی نہ ہو اور حکومت جو بھی قدم اٹھائے وہ مؤثر ثابت ہو، اس کے لیے ضروری ہے کہ مزدروں کو قانونی حقوق ملنے چاہیے تاکہ جب ان کے ساتھ ناانصافی ہو تو وہ قانوی چارہ جوئی کرسکیں۔

جب ان سے یہ سوال کیا گيا کہ بایاں محاذ غیر منظم سیکٹر کے مزدوروں میں زرعی اور غیر زرعی صنعت کے دو خانوں میں کیوں تقسیم کرنا چاہتی ہے تو ان کا کہنا تھا: ’دونوں مقامات پر کام کرنے کا طریقہ الگ ہے۔ اس لیے ہمارا مطالبہ ہے کہ زراعت کے شعبے میں کام کرنے والوں کے لیے ایک الگ بل لایا جائے اور ان کے لیے سماجی سکیورٹی گارنٹی کی ذمہ داری حکومت اپنے تئیں لے اور زراعت کو چھوڑ کر دیگر جگہوں پر کام کرنے والے مزدروں کی ذمہ داری کمپنی اور حکومت دونوں پر ہو‘۔

زراعت کے شعبے میں کام کرنے والوں کے لیے ایک الگ بل لایا جائے اور ان کے لیے سماجی سکیورٹی گارنٹی کی ذمہ داری حکومت اپنے تئیں لے کمیونسٹ رہنمامحمد سلیم

محمد سلیم نے الزام لگایا کہ حکومت نے غیر منظم سیکٹر کے مزدوروں کے حالات کے جائزے کے لیے ارجن سین گپتا کی قیادت میں ایک کمیٹی کی تشکیل کی تھی لیکن اب حکومت اپنی تشکیل کردہ کمیٹی کی سفارشات سے منہ موڑ رہی ہے۔

ارجن سین گپتا کمیٹی کے رکن اور مزدوروں کے لیے کام کرنے والے سوامی اگنی ویش نے بی بی سی کو بتایا کہ’محض سماجی سکیورٹی گارنٹی سیکموں سے کوئی بڑا فائدہ نہیں ہو سکتا۔ اس لیے حکومت سے ہمارا مطالبہ ہے کہ مزدروں کے لیے کم از کم مزدروی کا نفاذ قومی سطح پر ہو اور زیادہ کام کرنے پر اوور ٹائم کا بھی نظم ہوناچاہیے‘۔

مسٹر اگنی ویش کا کہنا ہے کہ’ سکیم کے تحت مالی ذمہ داری مرکزي حکومت اپنے ذمے لے کیونکہ مرکزی حکومت کے پاس وسائل کی کمی نہیں ہے اور اگر یہ ذمہ داری ریاستی حکومتوں پر ڈالی جاتی ہے تو اس کا نفاذ ممکن نہیں ہے‘۔

دلی کے نواح میں واقع گڑگاؤں کی ایک تعمیراتی فرم میں کام کرنے والے بہار کے ایک جونئیر بجلی مکینک عبدالصادق کے مطابق ’ہمارے ساتھ ہر جگہ ناانصافی ہوتی ہے، مثال کے طور پر میری تنخواہ سے پرووڈینٹ فنڈ (پی ایف) کے پیسے کاٹ لیے جاتے ہیں لیکن پی ایف نمبر نہیں دیاجاتا، مزدروی کبھی بھی وقت پر نہیں ملتی اور اس علاقے کے لیے حکومت کی مقرر کردہ کم سے کم مزدری نہیں دی جاتی‘۔

بعض ماہرین کا خیال ہے کہ گلوبلائزیشن کے اس دور میں جب اقتصادی اصلاحات کا عمل پوری دنیا میں تیز ہورہا ہے، ہندوستان میں مزدوروں کے حالات بہتر بنانے کے لیے سماجی سکیورٹی کے تحت صحت کی انشورنس اور کم از کم اجرت جیسے بنیادی سوالات پر ایک فل پروف نظام کی ضرورت ہے کیونکہ اقتصادی ترقی کے عمل میں صرف مالکان کو ہی فائدے کا حق حاصل نہیں ہے۔ مزدوروں کو بھی ایک بہتر زندگی کا حق حاصل ہے۔