ریحانہ بستی والا بی بی سی اردو ڈاٹ کام، ممبئی

	1993 میں ممبئی میں سلسلے وار بارہ دھماکے ہوئے تھے (فائل فوٹو)

ان مجرموں کی دفاعی وکیل ایڈوکیٹ فرحانہ شاہ نے بتایا کہ ’پہلی اپیل کے مسترد ہونے کے بعد انہوں نے اپنے مؤکلوں کی جانب سے عدالت میں فیصلہ سنانے کے عمل پر روک لگانے کی عرضداشت داخل کی ہے جس کی سماعت جمعہ کے روز ہو گی۔‘

بم دھماکہ کے مجرم سپریم کورٹ میں ایک اپیل داخل کرنے کی تیاری میں ہیں جس کے تحت وہ عدالت کے ذریعہ دی جا رہی سزا کے عمل کو غیر قانونی قرار دے رہے ہیں۔

بم دھماکہ کے سولہ مجرموں نے سترہ جون کو عدالت میں ایک اپیل داخل کی تھی جس میں انہوں نے سپریم کورٹ کے ایک فیصلہ کا حوالہ دیا۔سپریم کورٹ کے اس کیس میں جسٹس مارکنڈے کجو نے اپنی رائے دیتے ہوئے کہا تھا کہ ٹاڈا قانون کے ختم ہونے کے بعد کسی ملزم کو سزا دینا دستور کی دفعہ تین کے خلاف ہے۔

ٹاڈا قانون چوبیس مئی انیس سو پچانوے کو ختم کر دیا گیا تھا لیکن ملک کی کئی عدالتوں میں اس قانون کے تحت گرفتار ملزموں پر مقدمہ چل رہا ہے اور اس پر عدالتیں اپنا فیصلہ بھی دے رہی ہیں۔ انیس سو ترانوے بم دھماکے کے سو مجرموں میں سے عدالت نے 76 کو سزا سنائی تھی اور باقی کو سزا سنانا ابھی باقی ہے لیکن ان بقیہ مجوموں میں سے سولہ نے سپریم کورٹ کے اس فیصلہ کے حوالے کو بنیاد بنا کر اس عمل پر روک لگانے کی کوشش کی تھی۔

ایڈوکیٹ شاہ کا کہنا ہے کہ ’یہ اب عدالت پر منحصر ہے کہ وہ مجرموں کو سپریم کورٹ جانے کی مہلت دیتی ہے یا ان کی اپیل کو مسترد کر کے اپنا فیصلہ سنانے کا عمل جاری رکھتی ہے۔‘