امرناتھ تیواری جھار کھنڈ

	حکام کے مطابق ماؤ نوازوں نے پوست کی کاشت ہزاری باغ کے چترا اور کٹسکامسنڈی علاقوں میں شروع کی تھی

پوست کے پودے افیون کی تیاری میں بھی استعمال کیے جاتے ہیں۔ حکام کے مطابق ریاست کے 22 اضلاع میں سے اٹھارہ میں ماؤ نواز باغی سرگرم ہیں۔ ماؤ باغیوں کا کہنا ہے کہ ملک کی پانچ ریاستوں میں وہ قبائیلوں کے حقوق کے لیے مسلح جدوحہد کر رہے ہیں۔

ماؤ نواز باغیوں نے پوست کی کاشت ہزاری باغ کے چترا اور کٹسکامسنڈی علاقوں میں شروع کی تھی جو اب بڑھ کر تین سو سے زائد دیہاتوں میں بیس ہزار ایکڑ تک پھیل چکی ہے۔

حکام کا کہنا ہے کہ اکتوبر میں پوست کی فصل لاکھوں روپے میں فروخت کی جاتی ہے۔

پولیس کا کہنا ہے کہ ماؤ نواز باغی نہ صرف پوست کی کاشت کر رہے ہیں بلکہ کسانوں اور پوست کے تاجروں سے ٹیکس بھی لے رہے ہیں۔

ہزاری باغ کے پولیس چیف پروین سنگھ نے بی بی سی کو بتایا ہے کہ ’ماؤنواز باغی یہاں پوست کی کاشت کر رہے ہیں اور اس سال انہوں نے تجرباتی طور پر کئی اضلاع میں پوست کی کاشت شروع کی تھی‘۔ ان کا کہنا ہے کہ ’ہر سال ان کی موجودگی مضبوط ہوتی جا رہی ہے‘۔

	پوست کی کاشت اب تین سو سے زائد دیہاتوں میں بیس ہزار ایکڑ تک پھیل چکی ہے

ریاست کے انٹلیجنس افسر غریبن پاسوان کا کہنا ہے کہ ’ ماؤ نواز باغیوں کی سرگرمیوں سے متاثرہ علاقوں کے کسان تیزی سے پوست کی کاشت کر رہے ہیں اور باغیوں کے لیے یہ ایک بہتر تجارت ثابت ہوئی ہے‘۔

ایک ما‎ؤ باغی نرپندیو مہتو کا کہنا ہے کہ وہ اپنے ساتھیوں کے ساتھ گزشتہ دو برسوں سے پوست کی کاشت کر رہے ہیں۔ ان کے مطابق ’ہم لوگ پوست کی کھیتی اس لیے کر رہے ہیں کیونکہ ہمیں اپنی تنظیمں چلانے کے لیے پیسے کی ضرورت ہوتی ہے۔ یہ ایک فائدے مند کاروبار ہے۔ ہم کسانوں کو پوست کی کاشت کرنے کے لیے زور زبردستی نہیں کرتے حالانکہ ہم ان کو کھیتی کرنے کا مشورہ دیتے ہیں اور انہیں پولیس اور لالچی تاجروں سے بچاتے ہیں‘۔

مسٹرمہتو کا مزید کہنا ہے کہ اس علاقے میں پولیس کو آنے کی ہمت نہيں ہو تی اس لیے پوست کی کاشت کے لیے یہ نہایت محفوظ علاقہ ہے۔

ایک ماؤ نواز باغی دیپندر ڈانگی کا کہناہے کہ بازار میں ایک کلو گرم پوست سے بیس سے پچیس ہزار روپے کی آمدنی ہو جاتی ہے۔ جب کہ ایک کلو پوست پیدا کرنے میں تین سو سے چار سو روپے کا خرچ آتا ہے۔

پوست کی کاشت سے خطیر رقم ملنےکے سبب ان علاقوں کے کسانوں میں خوشحالی ہے پوست کے بیشتر کسانوں کے پاس اینٹ کے پکے مکان ہیں اور کئی موٹر سائیکل اور کاریں خرید رہے ہیں۔

	انڈیا میں ماؤ نواز یا نکسل باڑی تحریک 1967 میں شروع ہوئی

پولیس کا کہنا ہے کہ اس نے ریاستی حکومت کو اپنی رپورٹ دے دی ہے جس میں اس نے کہا ہے کہ ماؤنواز باغی نہ صرف پوست کی کاشت کر رہے ہیں بلکہ پوست کی کاشت کے لیے کسانوں سے زبردستی بھی کر رہے ہیں۔

ماؤنواز باغی ہندوستان کے ایک سو بیاسی اضلاع میں سرگرم ہیں جو جھار کھنڈ، بہار، آندھرا پردیش، چھتیس گڑھ، مدھیہ پردیش، مہاراشٹر اور مغربی بنگال میں ہیں۔