فیصل محمد علی بھوپال

	پنچائیت کے اجلاس میں سندھی سماج کی لڑکیوں کے سکوٹر چلانےپر پابندی کا فیصلہ کیاگيا

بدھ کو پنچایت کے ایک اجلاس میں سندھی سماج کی لڑکیوں پر اس قسم کی پابندی عائد کرنے کا فیصلہ کیاگيا ہے۔ پنچائیت کا یہ فیصلہ گزشتہ پندرہ دنوں کے ان واقعات کے پیش نظر سامنے آیا ہے جس میں دو سندھی لڑکیوں نے گھر سے بھاگ کر مسلم لڑکوں سے شادیاں کر لیں جس کی وجہ سے سندھی سماج میں کافی غم و غصہ پایا جاتا ہے۔ سخت گیر ہندو تنظیمیں آر ایس ایس اور بجرنگ دل نے اس کو اور ہوا دی ہے۔

اس ماہ کی شروعات میں تئیس سالہ پرینکا وادھوانی ایک مسلم لڑکے محمد عمر کے ساتھ ممبئی بھاگ گئی جہاں عمر نے ہندو مذہب اپنایا اور دونوں نے ہندو روایت کے مطابق شادی کرلی۔ ابھی یہ معاملہ گردش میں ہی تھا کہ چند روز بعد ایک اور سندھی لڑکی نیتو جودھانی نے مسلم لڑکے ریحان سے شادی کر لی۔

اجلاس کے دوران پنـچائیت کا کہنا تھا کہ موبائل فون اور گرد و غبار سے بچنے کے لیے چہرے کو دوپٹے سے چھپانا اس طرح کے حالات کی ایک بڑی وجہ ہے۔

علاقے میں ہندو لڑکیوں کی ایک بڑی تعداد سکوٹر چلاتی ہے اور گرم موسم میں گرد و غبار سے بچنے کے لیے لڑکیاں چہروں کو ڈھانک لیتی ہیں۔

اس ماہ کی شروعات میں تئیس سالہ پرینکا وادھوانی ایک مسلم لڑکے محمد عمر کے ساتھ ممبئی بھاگ گئی تھی جہاں عمر نے ہندو مذہب اپنایا اور دونوں نے ہندو روایت کے مطابق شادی کرلی۔ ابھی یہ معاملہ گردش میں ہی تھا کہ چند روز بعد ایک اور سندھی لڑکی نیتو جودھانی نے مسلم لڑکے ریحان سے شادی کر لی تھی

آر ایس ایس کے سینئر رہنما اتم چند اسرانی کی سربراہی میں بھوپال میں ایک میٹنگ ہوئی۔ ہندو لڑکیوں کو مسلم لڑکوں کے چنگل سے بچانے کے ایک ’ہندو کنیا رکشا‘ یعنی ہندوں لڑکیوں کی حفاظت کے لیے ایک کمیٹی بنائی گئی ہے۔

بجرنگ دل کے کارکنوں نے اس معاملے کے خلاف شہر میں اجتجاج، ہڑتال اور پولیس سے عمر کی گرفتاری کا مطالبہ کیا ہے۔ بجرنگ دل نے بدھ کو بھوپال میں مظاہرہ بھی کیا۔ تنظیم کے کارکن راجندر گپتا کا کہنا ہے ’ایک سازش کے تحت ہندو لڑکیوں کو بہلا پھسلا کر ایسے کاموں کو انجام دیا جارہا ہے‘۔

عورتوں کے حقوق کے لیے کام کرنے والی سماجی کارکن دیوندر کور اپل کا کہنا ہے کہ اس قسم کے فیصلے عورتوں کی آزادی پر حملہ ہے اور آج کے دور میں جب خواتین مردوں کی برابری کر رہی ہیں تو اس طرح کے فیصلے کی سخت مخالفت ہونی چاہيے۔

اسی دوران ممبئی اور جبل پور ہائی کورٹ نے پرینکا اور عمر کی شادی کو جائز ٹھہراتے ہوئے پولیس کو انہیں تحفظ فراہم کرنے کا حکم دیا ہے اور اس معاملے میں پولیس کی کوتاہی پر اسے ایک نوٹس بھی بھیجا ہے۔