خدیجہ عارف بی بی سی اردو ڈاٹ کام، دلی

	انڈیا سائنسی اور معاشی ترقی کے نئے دور میں داخل ہونے والا ہے

لیکن حقیقت اس سےمختلف ہے اور ہندوستان شاید آج بھی ان ملکوں میں سے ایک ہے جہاں نسل، ذات، علاقے اور زبان کی بنیاد پر اقلیتیوں اور دیگر طبقوں کے تیئں تفریق کے معاملے اکثر سامنے آتے ہیں۔ اس کے سبب ان کے بارے میں ایک روایتی شبیہ بن جاتی ہے جو عام زندگی میں متاثرہ افراد کے لۓ مشکلات پیدا کرتی ہے۔

حال ہی جب ہندوستانی فلم اداکارہ شلپا شیٹی کے ساتھ برطانیہ کے ایک ٹی شو میں نسل پرستی کا معاملہ سامنے آیا تو برطانیہ سے لیکر ہندوستانی عوام اور حکومت نے اس کی زبردست مذمت کی۔ اس معاملے نے یہ سوچنے پر مجبور کردیا کہ کیا ہندوستان میں آج بھی ذات اور نسل کے بنیاد پر تفریق نہیں ہوتی ہے؟ کیا ہندوستان میں 1984کے سکھ مخالف، انسی سو بانوے کے بابری مسجد کےانہدام کے بعد مسلم مخالف ، اور دو ہزار دو کے گجرات کے فرقہ وارانہ فسادات اور دلتوں کے ساتھ امیتازی سلوک کے معاملات سامنے نہیں آئیں ہیں؟ کیا آج بھی اخبار میں شادیوں کے اشتہار میں گورے رنگ کی لڑکی اور اپنی ذات کو ترجیج نہیں دی جاتی ہے؟

انہیں سب سوالوں۔۔۔۔ اور کسی بھی مخصوص برادری اورعلاقائی لوگوں کے بارے میں عوام کیا سوچتی ہے؟ یہ جاننے کے لیے میں نے دلی کی سڑکوں پر بعض لوگوں سے کچھ سوالات کئے۔

	اکثر نسلی اور مذہبی فسادات ہوتے رہتے ہیں

میں نے ان لوگوں سے بھی بات کی جو اس قسم کی تفریق کا شکار ہوتے ہیں۔

تاپتی کا تعلق اڑیسہ سے اور دلی تعلیم حاصل کرنے آئی ہیں انکا کہنا تھا ’اڑیسہ کے بارے میں لوگ کم جانتے ہیں اور اسکا نقصان یہ ہوا کہ لوگ انہیں منی پور کا سمجھ کر ’چنکی‘ کہتے ہیں‘۔

دلی میں بیشتر افراد شمال مشرق کی لڑکیوں کو ' چنکی' کہتے جو کہ ایک منفی شبیہ ہے۔

عامل افغانستان سے ہندوستان تعلیم حاصل کرنے آئے ہیں لیکن افغانستان سے تعلق رکھنے کا نقصان یہ ہوا کہ انہیں ہرکوئی شک کی نظر سے دیکھتا ہے۔ان کا کہنا ہے ’مجھے میرے نام اور میرے افغانی ہونے کی وجہہ سے کرائے پر گھر ملنے میں پریشانی ہوئی کیونکہ سب لوگ یہ سمجھتے تھے میرا تعلق طالبان سے ہے۔ اور لوگ تعجب سے یہ پوچھتے کہ تمہیں ہندوستانی ویزا کس نے دی‘۔

عمرانیات کے ماہر امتیاز احمد کا کہنا ہے ’ہندوستان میں نسل پرستی، فرقہ پرستی اور ذات پات کی بنیاد پر تفریق عام بات ہے۔کیوں کہ ہندوستان کو ایک ہندو ملک کی طرح سے تصور کیا گیا تھا اور جو بھی اس دائرے سے باہر ہيں ان کے بارے میں ایک روایتی شبیہ بن گئی ہے‘۔

ان کا کہنا ہے’ہندوستان میں آج بھی ہندو مسلم کے بارے میں کوئی بھی بات چیت تفریق کے بغیر ممکن نہیں ہے کیوں کہ اس سماج میں آج بھی دوسرے کو قبول نہیں کیا جاتا ہے، مسلمان دہشت گر د ہیں، ایتھنیک گروپ کے لوگ گندے ہوتے ہیں، منی پوری اور ناگا غلط ہیں اور کبھی صحیح نہیں ہوسکتے‘۔

اس معاملے پر روشنی ڈالتے ہوئے ریاست آسام سے تعلق رکھنے والے گلوکار امتیاز سائکیا کا کہنا ہے" کسی بھی برادری اور مذہب کے افراد کی روایتی تصورات کو برقرار رکھنے میں میڈیا نے ایک اہم کردار ادا کیا ہے۔ ہندوستانی فلموں میں مسلمان عورت وہی ہے جو برقہ پہنتی ہو، پہاڑی آدمی ہمیشہ چوکی دار کا ہی رول کرتا ہے اور سردار صرف مذاحیہ کردار ادا کرتے ہیں۔ رشتوں کے لیے آج بھی اخباری اشتہارات میں گوری لڑکی کی ہی تلاش کی جاتی ہے"۔

	دلی میں سکھ فسادات کے حوالے گزشتہ سال ہونے والا مظاہرہ

تجزیہ کار پشپیش پنت کا کہنا ہے ’ہندوستان میں نئی نسل اپنے تجربات سے لوگوں کے بارے میں اپنی رائے بناتے ہیں نہ کہ میڈیا اور ادب میں پیش کی گئی روایتی شبیہ کی بنیاد پر‘۔

امتیاز احمد کاخیال ہے ’ملک چاہے قومی یک جہتی کے کتنے ہی نعرے لگا لے، کتنے ہی ترقی کے دعوے کرلے لیکن اسے ابھی بھی ہزاروں برس پرانی نسل، ذات اور مذہب، رنگ اور زبان کی بنیاد پر ہونے والی تفریق کو مٹانا ہوگا اور یہ تب ہی ممکن ہوگا جب ملک اور اس کے میڈیا پر کسی ایک ذات اور مذہب کے لوگوں کا غلبہ نہ ہو‘۔