سوبیر بھومک بی بی سی، ڈبروگڑھ، آسام

	آسام اور اروناچل پردیش میں الفا کے خلاف کارروائی کا منصوبہ تیار ہو گیا ہے: وزیر مملکت برائے داخلہ

حکمران جماعت کانگرس کے ایک مقامی رہنما کو بھی باغیوں نے ہلاک کر دیا ہے۔

ملک کے حساس علاقے آسام میں گزشتہ چار روز سے جاری تشدد کے ان واقعات میں اب تک 69 افراد ہلاک ہوئے ہیں جن میں بیشتر ہندی بولنے والے افراد ہیں۔

ریاستی حکومت نے ان حملوں کے پیچھے علحیدگی پسند گروپ آسام یونائٹڈ لبریشن فرنٹ یعنی الفا کا ہاتھ بتایا ہے جبکہ الفا نے نہ تو ان حملوں کی ذمہ داری قبول کی ہے اور نہ ہی اس سے انکار کیا ہے۔

پیر کی صبح ہونے والا حملہ ایک اینٹ بنانے والی بھٹي پر کیا گيا۔

مذاکرات  علیحدگی پسند تنظیم الفا سے اس وقت تک مذاکرات نہیں کئے جائيں گے جب تک الفا آسام کی آزادی کے مطالبے سے دستبردار نہ ہوجائے وزیر مملکت برائے داخلہ

آسام میں حکمران جماعت کانگرس کے ایک مقامی رہنما کو بھی باغیوں نے ہلاک کر دیا ہے۔ کانگرس کے رہنما کی ہلاکت کے بعد علاقے میں اس بات کا بھی خوف پیدا ہو گیا ہے کہ اب باغیوں نے کانگرس کے حمایتیوں کو بھی نشانہ بنانا شروع کردیا ہے۔

آسام کے حالات کا جائزہ لینے کے ہندوستان کے وزیر مملکت برائے داخلہ سری پرکاش جیسوال کی سربراہی میں ایک اعلیٰ سطحی کمیٹی تشکیل دی گئی ہے۔

اتوار کے روز علاقہ کے دورے کے بعد مسٹر جیسوال نے کہا تھا کہ علیحدگی پسند تنظیم الفا سے اس وقت تک مذاکرات نہیں کیے جائيں گے جب تک الفا آسام کی آزادی کے مطالبے سے دستبردار نہ ہوجائے۔

انہوں نے یہ بھی کہا تھا ’اگر علیحدگی پسند تنظیم الفا یہ سمجھتی ہے کہ تشدد کے زور پر مذاکرات کیے جا سکتے ہیں تو یہ اس کی غلط فہمی ہے۔‘

انہوں نے کہا کہ ’حکومت آسام میں امن کی بحالی کے لیے کوشاں ہے اور اگر الفا تشدد کو ترک کر کے تحریری طور پر مناسب مطالبات کے ساتھ مذاکرات کے لیے آگے آئے تو حکومت بات چیت کے لیے تیار ہے۔‘

ہلاکتیں آسام میں گزشتہ چار روز سے جاری تشدد کے ان واقعات میں اب تک 69 افراد ہلاک ہوئے ہیں جن میں بیشتر ہندی بولنے والے افراد ہیں

مسٹر جیسوال نے یہ بھی اعلان کیا تھا کہ حالات پر قابو پانے کے لیے تقریباً تین ہزار نیم فوجی دستے آسام کے لیے روانہ کیئے جائيں گے۔ انہوں نے یہ بھی بتایا کہ پولیس اور فوج کا آسام اور اس کی پڑوسی ریاست اروناچل پردیش میں الفا کے ٹھکانوں پر مشترکہ کارروائی کا منصوبہ تیار ہو گیا ہے اور جلد ہی کارروائی شروع کی جائے گي۔

پرکاش جیسوال نے آسام میں آباد ہندی بولنے والے آباد کاروں کو یقین دہانی کرائی کے ان کی حفاظت کے مکمل انتظامات کیے جائیں گے۔

تشدد کے واقعات میں ہندی بولنے والوں کو خصوصی طور پر نشانہ بنائے جانے کے سبب آسام میں ہندی آبادی میں اضطراب پیدا ہو چکا ہے اور ہزاروں کی تعداد میں ہندی بولنے والےافراد تن سکیا اور ڈبروگڑھ چھو ڑ کر جانے کی تیاری کررہے ہیں۔