ایم ایس احمد پٹنہ

	بہار میں آئندہ تین چار دنوں میں سردی میں کمی متوقع ہے

پٹنہ کے موسمیات کے ڈائریکٹر ڈاکٹر ٹی این جھا کے مطابق ریاست میں کم سے کم درجہ حرارت اور زیادہ سے زیادہ درجہ حرارت میں بڑے فرق کے سبب لوگ سردی کی تاب نہ لاکر ہلاک ہو رہے ہیں۔

ڈاکٹر جھا نے بتایا کہ سری نگر اور دوسری جگہوں پر بہار سے بھی کم درجہ حرارت رہتا ہے لیکن وہاں سے ہلاکتوں کی خبر اس لیے نہیں آتی کہ ان جگہوں پر میکسیمم اور منیمم میں فرق بہت کم ہوتا ہے۔ بہار میں یہ فرق بہت زیادہ ہے۔

سال کی پہلی تاریخ سے سردی بڑھنے اور اس کی وجہ سے پیدا ہونے والی بیماریوں سے ہلاکتوں کی خبر آنی شروع ہو گئی تھی۔ریاست کے مختلف علاقوں سے سردی کے باعث پھیلنے والے ڈائیریا کی خبر ہے۔

سردی اور کہرے کی وجہ سے ریل اور ہوائی ٹریفک بری طرح متاثر ہوئی ہے۔
مرنے والوں کے بارے میں حکومت کی جانب سے کوئی اعداد و شمار نہیں دیے گئے لیکن مقامی اخباروں اور ہسپتالوں کے ذرائع کے مطابق اب تک سو سے زائد لوگ سردی کی وجہ سے مر چکے ہیں۔

زبردست سردی کی وجہ سے پیدا ہونےوالے مسائل کی وجہ سے وزیر اعلی نتیش کمار نے دس جنوری تک تمام سکولوں کو بند رکھنے کا حکم دیا ہے۔اس کے علاوہ کئی یونیورسٹیوں میں بھی چھٹی کا اعلان کر دیا گیا ہے۔

تمام ضلعوں کی انتظامیہ کو حکومت کی جانب سے چوک چوراہوں پر لکڑی جلانے کا اہتمام کرنے کو کہا گیا ہے۔

سردی سے مرنے والوں میں زیادہ تر تعداد ان لوگوں کی ہے جو فٹ پاتھوں پر زندگی گزارتے ہیں۔

پٹنہ میٹرولوجیکل آفس کے ڈائرکٹر ڈاکٹر جھا کے مطابق ریاست میں سب سے کم درجہ حرارت پانچ ڈگری سیلسیس کے آس پاس ہے۔انہوں نے بتایا کہ پوری ریاست میں زبردست کہرا چھا رہا ہے۔

ڈاکٹر جھا نے بتایا کہ آئندہ تین چار دنوں میں سردی میں کمی ہو سکتی ہے۔