سدھارتھ وردہراجن دلی

	خارجہ سیکرٹری شوشنکرمینن نے کہا ہے کہ ممبئی بم دھماکوں کی تحقیقات سے حاصل ہونے والے ثبوت پاکستان کو فراہم کیئے جائیں گے

واضح رہے کہ پاکستان اس سے پہلے کہہ چکا ہے کہ ہندوستان نے بے بنیاد الزام ‏عائد کیئے ہیں۔

اس دوران دونوں ملکوں کے درمیان دہشت گردی پر قابو پانے کے لیئے جو ’میکنزم‘ بنایا گیا ہے اسے عمل میں لانے کی سب سے زيادہ ضرورت ہے ۔ اس کے تحت ہندوستان تمام شواہد پاکستان کے سامنے پیش کرے اور اسی کی بنیاد پر بات چیت آگے بڑھائی جائے۔

اس معاملے کا ایک پہلو یہ بھی ہے کہ اس میں نہ تو پاکستان کا رویہ صحیح ہے اور نہ ہی ہندوستان کا۔

جس طرح ممبئی میں پولیس کمشنر نے ذرائع ابلاغ کے سامنے بیان دیا ہے اس سے کچھ حاصل نہیں ہوگا۔ اگر ہندوستان کے پاس ثبوت موجود تھے تو اسے میڈیا کے پاس جانے کے برعکس اسے ’جوانٹ میکنزم‘ کے تحت یہ ثبوت پاکستان کے سامنے پیش کرنے چاہئیں تھے۔

محسوس یہ ہوتا ہے کہ دونوں ملکوں کی حکومتوں نے یہ فیصلہ کر لیا ہے کہ اس معاملے پر ساری بات چیت میڈیا کے ذریعے ہی کی جائے گی۔

توقع کی جاتی ہے کہ جو الزام ممبئی پولیس نے پاکستان پر عائد کیا ہے اس کی بنیاد کمزور نہیں ہو گی۔ ڈر صرف اس بات کا ہے کہ کہیں یہ ثبوت حراست میں اقبالیہ بیان کی مدد سے ہی حاصل نہ کیئے گئے ہوں۔ بعض اوقات اس قسم کے اقبالیہ بیانات کو عدالت اہمیت نہيں دیتی ہے۔

اس سلسلے میں آگے کے اقدامات کا رخ شواہد کی تفصیلات سے ہو گا اور یہ بھی ایک اہم بات ہوگی کہ ہندوستان انہيں پاکستان کے سامنے کس طرح پیش کرتا ہے اور پاکستان اس پر کیا رد عمل ظاہر کرتا ہے اور سب سے بڑی بات یہ ہے کہ جب دونوں ملکوں نے دہشت گردی پر قابو پانے کے لیئے ایک خصوصی ’میکنزم‘ بنایا ہوا ہے تو اسے کام کرنے کا موقع بھی تو دینا چاہئیے۔

دوسری جانب پاکستان کے صدر پرويز مشرف نے یہ قبول کیا ہے کہ ملک کی خفیہ ایجسنی آئی ایس ائی میں بعض خراب عناصر ہو سکتے ہیں۔

ممبئی پولیس نے آئی ایس آئی کے بارے میں تفصیلات جاری نہیں کی ہیں اور یہ بھی نہیں بتایا ہے کہ ثبوت سرکاری نوعیت کے ہیں یا پھر غیر سرکاری۔