ریحانہ بستی والا بی بی سی اردو ڈاٹ کام، ممبئی

	ممبئی اسٹاک ایکسچنج دھماکوں کے بعد

اس معاملے میں قصور وار پائے گئے لوگوں میں یعقوب میمن، عیسی میمن، یوسف میمن اور روبینہ میمن شامل ہیں جبکہ سلیمان میمن، حنیفہ میمن اور راحین میمن کو بری کر دیا گیا ہے۔ ایک دیگر ملزم عبد الرزاق انتقال کر چکے ہیں۔

یعقوب میمن گزشتہ دس برس سے جیل میں ہیں۔ عدالت جب یہ فیصلہ سنا رہی تھی اس وقت یعقوب عدالت میں موجود تھے۔ فیصلہ آنے سے قبل تو ان کے چہرے پر کوئی شکن دکھائی نہیں دے رہی تھی لیکن فیصلہ سنتے ہی وہ عدالت میں بر ہم ہوگئے ۔ انکا کہنا تھا کہ ’یہاں بےقصوروں کو دہشتگرد بنایا جا رہا ہے، یہاں سب ڈرامہ چل رہا ہے۔‘

یعقوب اور ان کی فیملی کے ارکان دھماکوں کے بعد ملک سے باہر چلے گئے تھے۔ لیکن اعلیٰ سیاسی رہنماؤں کی یقین دہانی کے بعد انہوں نے خودسپردگی کردی تھی اور انہیں امید تھی کہ شاید عدالت ان کے ساتھ نرمی برتے۔

یعقوب میمن برہم ہوگئے  عدالت نے اپنا فیصلہ سناتے وقت جب یعقوب کی بھابھی روبینہ میمن کو بھی مجرم قرار دیا تو یعقوب میمن برہم ہوگئے۔ انہوں نے کہا کہ ’اس (ٹائگر میمن) نے کہا تھا کہ تو مہاتما گاندھی بننے چلا ہے۔ اس کی سزا بھگتے گا۔ آج تیرہ برس جیل میں گزارکر اس بات کا اچھی طرح اندازہ ہوگیا۔‘ٹائگر میمن نے یعقوب کو انڈیا واپس آنے سے منع کیا تھا۔

ٹائگر میمن نے یعقوب کو انڈیا واپس آنے سے منع کیا تھا۔ یعقوب میمن کا شمار ممبئی کے بہترین چارٹرڈ اکاؤنٹنٹس میں ہوتا تھا اور انہیں ایک ذہین شخص سمجھا جاتا تھا۔

عدالت کے باہر سرکاری وکیل اجول نگم نے صحافیوں کو بتایا کہ انہوں نے عدالت سے درخواست کی ہے کہ جو لوگ اس واقعہ میں براہ راست ملوث تھے ان کی سزاؤں کا تعین جلد سے جلد کیا جائے۔

انہوں نے امید ظاہر کی ہےکہ سزائيں دینے کا عمل بھی کل سے شروع ہو جائے گا۔
اس معاملے میں 123 افراد کے خلاف گزشتہ تیرہ برس سے مقدمہ چل رہا ہے۔

مافیا ڈان داؤد ابراہیم، ان کے بھائی انیس ابراہیم، ٹائگر میمن اور ان کے کئی ساتھی اس واقعہ کے اصل ملزم بتائے جاتے ہیں۔ یہ سبھی ملک سے فرار ہیں۔

ملزموں میں فلم اسٹار سنجے دت بھی شامل ہیں۔ ان کے اوپر غیرقانونی طور پر اسلحہ رکھنے کا الزام ہے جو فرد جرم کے مطابق مافیا ڈان ابوسالم نے فراہم کیا تھا۔ اس معاملے میں سنجے دت ڈیڑھ برس جیل میں گزار چکے ہيں اور اس وقت وہ ضمانت پر رہا ہیں۔

باقی ملزمین کا فیصلہ بدھ سے آٹھ آٹھ کے گروپ میں سنائے جانے کی توقع ہے۔