شکیل اختر بی بی سی اردو ڈاٹ کام، دلی

	نٹورسنگھ اب شاید کانگریس چھوڑنے کے لیے ذہنی طور پر تیار ہیں

سابق وزيرخارجہ نٹور سنگھ اور حزب اختلاف کے رہنماؤں نے پارلیمنٹ میں وزیراعظم منموہن سنگھ کے خلاف مراعات شکنی کا نوٹس دیا ہے اب وہ اس پر بحث کا مطالبہ کر رہے ہیں۔

مسٹر سنگھ نے الزام لگایا ہے کہ تحقیقاتی کمیٹی کی رپورٹ پارلیمنٹ ميں پیش کیے جانے سے قبل ہی وزیراعظم نے اسے لیک کیا ہے۔

اس رپورٹ میں کہا گیا ہے کہ ’مسٹر سنگھ نے تیل کا ٹھیکہ دلانے میں اپنے اثر و رسوخ کا استعمال کیا اور اس میں مدد کی۔ تاہم ایسا کوئی ثبوت نہیں ملتا کہ مسٹر سنگھ نے ذاتی طور پر کوئی فائدہ اٹھایا ہو۔‘

نٹور سنگھ اور رپورٹ  مسٹر سنگھ نے تیل کا ٹھیکہ دلانے میں اپنے اثر و رسوخ کا استعمال کیا اور اس میں مدد کی۔ تاہم ایسا کوئی ثبوت نہیں ملتا کہ مسٹر سنگھ نے ذاتی طور پر کوئی فائدہ اٹھایا ہو۔

تاہم پیر کے روز پارلیمنٹ میں پیش کی گئی پاٹھک تحقیقاتی کمیٹی کی رپورٹ میں کانگریس کو تمام الزامات سے بری کر دیا گیا ہے۔

مسٹر سنگھ نے وزیراعظم کے خلاف مراعات شکنی کا نوٹس دینے کے بارے ميں کہا کہ ’اس میں ذاتی طور پر منموہن سنگھ کے خلاف کوئی پہلو نہیں ہے، میں نے یہ نوٹس وزیراعظم کے خلاف دیا ہے کیوں کہ تحقیقاتی رپورٹ وہيں سے لیک ہوئی ہے۔‘

حزب اختلاف کی جماعتیں مراعات شکنی کے نوٹس پر فورا بحث کا مطالبہ کر رہی تھیں لیکن دونوں ایوانوں میں انہیں اجازت نہیں ملی تو انہوں نے دن بھر پارلیمنٹ میں کارروائی نہیں چلنے دی۔

حکمراں کانگریس کے رہنما اور پارلیمانی ترجمان پریہ رنجن داس منشی کا کہنا تھا کہ ’مراعات شکنی کے نوٹس زیر بحث ہیں اور اگر اس مرحلے پر میں نے رپورٹ افشاں ہونے کے بارے میں کسی طرح کا کوئی بیان دیا تو یہ نوٹس کو متاثر کرنے کے مترادف ہوگا۔‘

کانگریس اب سابق وزیرخارجہ نٹور سنگھ کے خلاف تادیبی کارروائی کی تیاریاں کر رہی ہے۔ایسا لگتا ہے کہ مسٹر سنگھ بھی کانگریس سے اپنی پچاس برس سے زيادہ کی وابستگی ختم کرنے کے لیے تیار ہیں۔ انہوں نے اتوار سے ہی حزب اختلاف کے رہنماؤں سے ملاقاتیں شروع کر دیں ہيں۔