حزب اختلاف نے مطالبہ کیا ہے کہ نٹور سنگھ کو گرفتار کیا جانا چاہیے اور کانگریس کی سونیا گاندھی کو بھی استعفٰی دینا چاہیے

کانگرس پارٹی کے ترجمان آنند شرما کے مطابق نٹور سنگھ نے کابینہ کے عہدے سے استعفیٰ کی پیشکش وزیر اعظم من موہن سنگھ کو کی ہے جو اس وقت روس کےدورے پر ہیں۔

نٹور سنگھ کو وولکر کمیشن کی رپورٹ کے منظر عام پر آنے کے بعد وزارت خارجہ عہدے سے ایک مہینے پہلے ہٹا دیا گیا تھا لیکن وہ بدستور کابینہ کے ممبر تھے۔

بھارتی وزیر اعظم من موہن سنگھ نے روس کے دورے کے دوران کہا تھا کہ اگر نٹور سنگھ خود استعفیٰ دیں تو اس کو قبول کرنے پر غور کریں گے۔

کانگرس پارٹی کے ترجمان آنند شرما نے بتایا ہے کہ نٹور سنگھ نے وزیر اعظم کو روس میں ٹیلی فون پر بتایا کہ جب وہ دورے سے واپس آئیں گے تو وہ انہیں اپنا استعفیٰ پیش کر دیں گے۔

وزیر اعظم سے ٹیلی فون پر بات کرنے کے بعد نٹور سنگھ نے کانگرس کی صدر سونیا گاندھی سے بھی ملاقات کی۔

وولکر رپورٹ میں نٹور سنگھ پر عراق میں تیل برائے خوراک پروگرام میں فائدہ اٹھانے کا الزام لگایا گیا ہے۔

بھارتی حزب اختلاف کی جماعتوں نے مطالبہ کیا تھا کہ نٹور سنگھ کو فوری طور پرگرفتار کیا جائے جب کہ وزیراعظم منموہن سنگھ نے کہا ہے کہ اس معاملے میں قصورواروں کو بخشا نہیں جائے گا۔