صلاح الدین بی بی سی اردو ڈاٹ کام ، دلی

	انتیس اکتوبر کو ہونے والے ان دھماکوں میں ساٹھ سے زائد افراد ہلاک ہوئے تھے۔

وزارت خارجہ کی جانب سے جاری ایک بیان کہا گیا ہے کہ پاکستان کے وزیرخارجہ خورشید محمد قصوری نے اپنے ہندوستانی ہم منصب نٹور سنگھ سے فون پر بات چیت کی ہے اور بم دھماکے میں ہلاک ہونے والوں کے تئیں ہمدردانہ جذبات کا اظہار کر تے ہوئے ان دھماکوں کی مذمت کی ہے۔

اس سے قبل پاکستان کے صدر جنرل پرویز مشرف نے وزیراعطم منموہن سنگھ سے بم دھماکوں کے حوالے سے بات چیت کی تھی۔

اسی دوران دلی کے جوائنٹ پولیس کمشنر کرنیل سنگھ نے بم دھماکوں کی تفتیش کے متعلق ایک پریس کانفرنس میں کہا ہے کہ اس سمت میں مثبت پیش رفت ہورہی ہے۔ انہوں نے تفتیش کی تفصیلات بتانے سے انکار کیا لیکن انہوں نے بتایا کہ ابھی تک تمام قدم صحیح سمت میں اٹھائے گیے ہیں ۔ پولیس نے مشتبہ شخص کا ایک خاکہ بھی جاری کیا ہے۔

مسٹر کرنیل سے جب لشکر طیبہ کے اس بیان کے متعلق پوچھا گیا کہ ان دھماکوں میں وہ ملوث نہیں ہے تو انکا کہنا تھا ’جب تک تفتیش مکمل نہیں ہو جاتی سبھی شدت پسند تنظیمیں شک کے دائرے میں ہیں۔ لشکر طیبہ کی توجیہہ یہ ہے کہ وہ فوج کے علاوہ عام لوگوں پر حملے نہیں کرتی۔ لیکن سنہ انیس سو ستانوے میں وہ ایسا ایک بار کر چکے ہیں اس لیے انکے دعوے کو تسلیم کرنے کی ہمارے پاس کوئی خاص وجہ نہیں ہے۔‘

دلی میں انتیس اکتوبر کی شام کو تین بم دھماکے ہوئے تھے۔ اس میں ساٹھ سے زائد افراد ہلاک ہوئے۔

پولیس کے بیانات کے پیش نظر ہی لشکر طیبہ کے ایک ترجمان نے سری نگر میں بی بی سی کے دفتر میں فون کر کے بتایا تھا کہ ان دھماکوں میں وہ کسی طرح ملوث نہیں ہے۔ تنظیم نے دھماکوں کی مذمت بھی کی تھی۔