شکیل اختر بی بی سی اردو ڈاٹ کام، دلی

	وزیراعظم منموہن سنگھ کی حکومت کے لیے نٹور سنگھ کا معاملہ سیاسی بحران بن رہا تھا

شہری ترقی کی وزارت غلام نبی آزاد کے پاس تھی جنہیں ہندوستان کے زیر انتظام کشمیر کا وزیر اعلی بنایا گیا ہے- دلی میں عام طور پر یہ تاثر تھا کہ وزیر اعظم جےپال ریڈی کی کارکردگی سے مطمئن نہیں تھے-

پریہ رنجن داس منشی کو اطلاعات و نشریات کی وزارت سونپی گئی ہے اور آبی وسائل کی وزارت جو اب تک ان کے پاس تھی وہ بھاری صنعتوں کے وزیر سنتوش موہن دیب کو دی دی گئی ہے۔ منشی پارلیمانی امور کی وزارت کی ذمے داری بھی دیکھیں گے۔

وزیر اعظم نے خارجی امور کی وزارت اپنے پاس رکھی ہے۔ صدام حسین کے دور اقتدار میں عراق میں تیل کے بدلے خوراک پروگرام میں بدعنوانی کے ایک معاملے میں نٹور سنگھ کا نام آنے پر خارجی امور کی وزارت ان سے لے لی گئي تھی اور اب اس معاملے کی تحقیقات ہو رہی ہے۔

پروگراموں کے نفاذ کے وزیر مملکت آسکر فرنانڈیز کو اسپورٹس، نوجوانوں کے امور اور غیر ممالک میں آباد ہندوستانیوں کے امور کا اضافی چارج دیا گیا ہے۔

مرکزی کابینہ میں ایک عرصے سے بڑی تبدیلی کی توقع کی جا رہی تھی۔ تجزیہ کار ونود مہتہ کا کہنا ہے کہ یہ بہت معمولی اور عارضی رد و بدل ہے۔ ’وزیر اعظم کو جلد ہی کابینہ میں بڑی تبدیلی کرنی ہوگی اور ہو سکتا ہے کہ انہیں اس عمل میں کچھ لوگوں کو ناراض کرنا پڑے۔‘