صلاح الدین بی بی سی اردو ڈاٹ کام، دلّی

	ممبئی بم دھماکوں کے بعد دونوں ملکوں کے اعلٰی اہلکاروں کے درمیان یہ پہلی ملاقات ہے۔

ممبئی بم دھماکوں کے بعد بھارت کے بعض بیانات سے ایسا لگا تھا کہ شاید امن کا عمل تعطل کا شکار ہوجائے گا۔

بھارت کے خارجہ سکریٹری شیام سرن نے اپنے پاکستانی ہم منصب ریاض محمد خان سے بات چیت کے بعد صحافیوں کو بتایا کہ دونوں ملکوں کے درمیان امن کا عمل بہت اہم ہے اور ایسی تمام ممکنہ کوششیں کرنی چاہیں جس سے اس عمل پر کوئی منفی اثر نہ پڑے۔

ریا ض محمد خان نے بات چیت کو ’مثبت‘ قرار دیا اور کہا کہ ’ ہم نے اتفاق کیا ہے کہ ہم ایک دوسرے کے ساتھ رابطے میں رہیں گے۔‘ انہوں نے کہا کہ دونوں ملکوں کے لیے امن کا عمل بہت اہم ہے۔ ’اس کے علاوہ کوئی دوسرا راستہ نہیں ہے ۔ ہم نے بات چیت کی کہ ہم فی الوقت کہاں ہیں اور پیش رفت کے لیے ہمیں کیا کرنا چاہیۓ۔‘

شیام سرن نے کہا کہ دہشت گردانہ کاروائی کرنے والے شدت پسند گروہوں کے متعلق بھارت نے اپنی تشویش سے پاکستان کو آکاہ کردیا ہے۔ان کا کہنا تھا کہ دونوں ملکوں نے ممبئی بم دھماکوں کے متعلق کوئی بھی معلومات ملنے پر ایک دوسرے کو آگاہ کرنے پر بھی اتفاق کیا ہے۔

ممبئی بم دھماکوں کے بعد دونوں ملکوں کے اعلٰی اہلکاروں کے درمیان یہ پہلی ملاقات تھی۔ دونوں ملکوں کے درمیان گزشتہ جولائی میں ایک ملاقات طے تھی لیکن ممبئی دھماکوں کے بعد اسے ملتوی کردیا گیا تھا۔

بھارت نے الزام عائد کیا تھا کہ حملوں میں ان تنظیموں کا ہاتھ ہے جو پاکستان میں ہیں۔ لیکن پاکستان نے ان تمام الزمات کی تردید کی تھی اور کہا تھا کہ بم دھماکوں کی تفتیش میں وہ بھارت کی ہر ممکنہ مدد کے لیے تیار ہے۔

دونوں ملکوں کے خارجہ سیکرٹریوں کے اس تازہ بیان سے لگتا ہے کہ ہند پاک امن مذاکرات کے تیسرے دور کا آغاز جلد ہی ہوگا۔