نادیہ پرویز بی بی سی اردو ڈاٹ کام، دلی

	پولیس نے دو افراد کی ہلاکت کے معاملے کی تفتیش شروع کر دی ہے (فائل فوٹو)

پولیس کے مطابق جموں سے تقریبا ایک سو ستّر کلومیٹر دور ہلتک گاؤں میں سنیچر کی رات مشتبہ عسکریت پسندوں نے محمد شفی اور محمد نواز نامی دو افراد کو ان کے گھروں سے زبردستی باہر نکالا۔

پولیس کا کہنا تھا کہ مشتبہ عسکریت پسندوں نے ان افراد کے گلے کاٹنے کے بعد ان کی لاشیں جنگل میں چھوڑ کے چلے گئے۔ گاؤں والوں نے اس واقعے کی اطلاع پولیس کو دی۔

پولیس نے اس معاملے کی تفتیش شروع کر دی ہے لیکن اب تک کسی گروہ نے اس واقعے کی ذمہ داری قبول نہیں کی ہے لیکن پولیس کا کہنا ہے کہ شدت پسندوں کو اندیشہ تھا کہ یہ لوگ پولیس کے مخبر ہیں۔

خطے میں ان دنوں جاری دہشت گردانہ واقعات نے انتظامیہ کی پریشانی میں اضافہ کردیاہے۔ گزشتہ ماہ کے دوارن عسکریت پسندوں نے ریاست کی اقلیتی ہندو برداری اور پولیس تک خبریں پہنچانے والے افراد کو نشانہ بنانا شروع کر دیا ہے۔

اس سال مئی میں عسکریت پسندوں نے پینتس ہندوؤں کو ہلاک کر دیا تھا۔ ڈوڈا ضلع کے ایک گاؤں میں بھی مبینہ علیحٰدگی پسندوں نے بائیس ہندو دیہاتیوں کو ہلاک کردیا تھا۔ اودھم پور پولیس کو تیرہ ہندو چرواہوں کی لاشیں ملی تھیں۔