صلاح الدین بی بی سی اردو ڈاٹ کام، دلی

	شیوراج پاٹل کا کہنا تھا کہ ممبئی دھماکوں سے متعلق حکومت کے پاس بہت سی اطلاعات ہیں

حکومت نے امید ظاہر کی ہے کہ پولیس بہت جلد مجرموں کو گرفتار کرنے میں کامیاب ہوجائےگی۔

ممبئی کے متاثرہ علاقوں کا دورہ کرنے کے بعد دارالحکومت دلی میں وزیرداخلہ شیوراج پاٹل نے ایک نیوز کانفرنس میں بتایا کہ حکومت کے پاس بہت سی اطلاعات ہیں لیکن جب تک تفتیش مکمل نہیں ہو جاتی وہ کچھ بھی نہیں کہیں گے۔

ان کا کہنا تھا ’اگر ہم کچھ کہتے ہیں تو پولیس اور تفتیش کرنے والے حکام کے کام میں خلل پڑ سکتا ہے اسی لیے ہم ابھی کچھ نہیں بتائیں گے کہ کون اس کا ذمہ دار ہے اور کون نہیں‘۔

پریس کانفرنس میں اس سوال پر کہ کیا آپ پاکستان کو ان حملوں کا ذمہ دار نہیں مانتے تو انہوں نے کہا’یہ آّپ سے کس نے کہا؟۔ اسے آپ اپنے پاس ہی رکھیۓ‘۔

اگر ہم کچھ کہتے ہیں تو پولیس اور تفتیش کرنے والے حکام کے کام میں خلل پڑ سکتا ہے اسی لیے ہم ابھی کچھ نہیں بتائیں گے کہ کون اس کا ذمہ دار ہے اور کون نہیں شیوراج پاٹل

سیکرٹری داخلہ وی کے دگل نے کہا کہ’ دھماکوں کی شام سے ہی تفتیشی ایجنسیاں تیزی سے تحقیقات میں مصروف ہیں لیکن دھماکوں کے متعلق ابھی کوئی حتمی سراغ نہیں ملا ہے۔ ممبئی پولیس کو امید ہے کہ وہ بہت جلد مجرموں کو گرفتار کرلے گی‘۔

ان کا یہ بھی کہنا تھا کہ اس حوالے سے کسی بھی گروپ نے اب تک ذمہ داری قبول نہیں کی ہے۔

مسٹر دگل نے بتایا کہ متاثرہ علاقوں کا جائزہ لینے سے یہ بات صاف ہوگئی ہے کہ دھماکے بہت طاقتور تھے۔ ’ابھی تک فورنسک رپورٹ نہیں آئی ہے لیکن دھماکوں کی شدت سے لگتا ہے کہ آر ڈی ایکس کا بھی استعمال کیا گيا ہوگا‘۔

ایک سوال کے جواب میں مسڑ دگل نے کہا کہ سری نگر اور ممبئی کے دھماکوں میں ظاہری طور پر کوئی یکسانیت نہیں ہے کیونکہ ایک جگہ گرینڈ سے حملے ہوئے ہیں تو دوسری جگہ طاقت ور بم استعمال کیئےگئے ہیں لیکن دونوں کا مقصد ایک ہے کہ سماج میں کسی طرح افرا تفری کا ماحول پیدا کیا جائے۔