صلاح الدین بی بی سی اردو ڈاٹ کام دلی

	’حملے لوگوں میں خوف و ہراس پیدا کرنے کے لیے کیے گئے‘

ایک بیان میں حکومت نے عوام سے اپیل کی ہے کہ وہ افواہوں پر توجہ نہ دیں اور امن امان قائم رکھیں۔

ممبئی بم دھماکوں کے فوراً بعد وزیر داخلہ شیو راج پاٹل نے وزیر اعظم منموہن سنگھ کی رہائش گاہ پر اعلی اہلکاروں کے ساتھ ایک اہم میٹنگ کے بعد وزیر اعظم منموہن سنگھ کی طرف سے ایک بیان میں کہا کہ انڈیا دہشت گردوں کو شکست دینے کے لیے ’ مشترکہ‘ کوششیں کرینگے۔

میٹنگ میں قومی سلامتی کے میشر این کے نارئین کے علاوہ کئی دیگر سینئر اہل کار بھی موجود تھے۔

شیو راج پاٹل نے کہا کہ یہ صرف قیاس کیا جا سکتا ہے کہ کشمیر اور ممبئی کے دھماکوں میں کوئی ربط ہے لیکن حتمی طور پر تفتیش کے بعد ہی پتہ چلے گا کہ ان دھماکوں کے پیچھے کس کا ہاتھ ہے۔

مسٹر پاٹل نے کہا کہ ان دھماکوں کے متعلق کچھ پیشگی اطلاعات تو تھیں لیکن فی الوقت وہ اس سلسلے میں کچھ نہیں کہیں گے۔

بیان میں کہا گیا ہے کہ یہ حملے لوگوں میں خوف و ہراس پیدا کرنے کے لیے کیے گئے ہیں اور یہ بزدلانہ حرکت ہے۔

’ممبئی کی عوام نے ایک عشرہ قبل بھی اسی طرح کی دہشت گردی کا سامنا کیا تھااور امید ہے کہ وہ ان حالات کا مقابلہ حوصلہ سے کرینگے۔‘

ریلوے کے وزیر لالو پرساد یادو، کانگریس پارٹی کی صدر سونیا گاندھی اور داخلہ سکریٹری وی کے دگل بھی ممبئی پہنچ رہے ہیں۔

مسٹر دگل نے بتایا کہ وہ رات میں متاثرہ علاقوں کا دورہ کریں گے۔