ریحانہ بستی والا بی بی سی اردو ڈاٹ کام، ممبئی

	رؤف لالہ کو انعام میں شیورلیٹ ایویو کار ملی ہے۔

جیت کی خوشی میں نم آنکھوں کے ساتھ رؤف لالہ نے انڈین عوام کا شکریہ ادا کیا اور کہا کہ ’ ان کی اداکاری کے ساتھ عوام کے ووٹ بھی شامل تھے اور انڈین عوام کی محبت کی وجہ سے آج وہ یہ مقابلہ جیت سکے ہیں۔‘

مقابلہ کے آخری راؤنڈ میں رؤف لالہ کے ساتھ پاکستان کی ہی کامیڈین جوڑی علی حسن اور عرفان ملک تھے۔انہیں چوتھا مقام حاصل ہوا ہے اور ممبئی کے راجو نگم دوسرے نمبر پر رہے ہیں۔

رؤف لالہ کو انعام میں شیورلیٹ ایویو کار ملی ہے۔کراچی کے رہنے والے رؤف لالہ کافی دنوں سے ممبئی میں ہیں اور انہوں نے یہاں کی کافی سیر کی ہے لیکن ابھی تک وہ اپنی بہن نسیم کے گھر نہیں جا سکے ہیں۔ اب وہ فتح کا جشن وہیں منائیں گے۔

’میں گجرات کے جونا گڑھ کا رہنے والا ہوں لیکن تقسیم کے بعد میرے آبا و اجداد کراچی چلے گئے تھے۔میرے دل میں انڈیا آنے کی بڑی خواہش تھی لیکن مجھے پتہ نہیں تھا کہ اللہ تعالی اس انداز میں اور اتنی عزت کے ساتھ مجھے یہاں لانا چاہتا تھا۔ اب میں پورے انڈیا کی سیر کرنا چاہتا ہوں اور اپنی فیملی کے لیئے کچھ شاپنگ بھی۔‘

رؤف کے مطابق وہ گزشتہ برسوں سے پاکستان کی ٹی وی سیریل ، ڈرامہ اور فلموں میں کامیڈین کا کردار نبھاتے آئے ہیں اور اب وہ کہانی کار اور فلمساز بن گئے ہیں۔

انڈیا میں گزشتہ برس لافٹر چیلنج (ہنسی کا مقابلہ ) شروع کیا گیا تھا۔اس سال اس کا دوسرا دور تھا اور اس مقابلہ میں اس مرتبہ پاکستان کے فنکاروں نے بھی شرکت کی تھی۔

اس مقابلہ کے دونوں جج شیکھر سمن اور نوجوت سنگھ سدھو کے ساتھ مقابلہ کے فائنل میں مشوہر اداکارہ بپاشا باسو بھی مدعو تھیں۔شیکھر سمن نے رؤف لالہ کی جیت کو انڈیا اور پاکستان کی آپس کی محبت کی جیت قرار دیا۔

انڈین لافٹر چیلنج میں پہلی مرتبہ پاکستان سے کئی فنکاروں نے شرکت کی تھی اور جس میں آخری راؤنڈ تک علی حسن اور عرفان ملک بھی پہنچے تھے۔