پولیس نے ان پاکستانیوں کو مفرور قرار دیا ہے

پولیس کا کہنا ہے میچ کے بعد سے یہ افراد گم ہیں۔ان افراد کے فوٹوگراف بھی شائع کیے گئےہیں۔

پولیس کے مطابق موہالی میں پہلے ٹیسٹ میچ کے لیے دوہزار سات سو چون پاکستانی کرکٹ شائقین واہگہ بارڈر سے ہندوستان میں داخل ہوئے تھے لیکن ان میں سےگيارہ افراد دوبارہ لوٹ کر اپنے ملک نہیں گئے۔

ان کے ویزے کی میعاد ختم ہونے کے بعد مارچ کے آخر میں ان کے خلاف مقدمہ درج کیا گيا تھا۔ پولیس کا کہنا ہے کہ انہیں تقریبا ہر جگہ تلاش کیا گیا ہے لیکن ابھی تک کوئی سراغ نہیں مل سکا۔

پولیس نے انہیں مفرور قرار دیا ہے اوراسی لیے ان کی تصاویر جاری کی گئی ہیں۔ بعض خبروں کے مطابق پولیس کو خدشہ ہے کہ کہیں ان کا تعلق دہشت گردوں سے نہ ہو۔

ہندوستان اور پاکستان کے درمیان کھیلی گئی کرکٹ سیریز کو دیکھنے کے لیے ہزاروں کرکٹ شائقین کو ویزے جاری کیے گیے تھے۔ اس سے قبل پاکستان نے بھی ہندوستانی شائقین کو بڑی تعداد میں ویزے دیے تھے۔