شکیل اختر بی بی سی، اردو ڈاٹ کام، دلی

	انٹرنیشنل اٹامک انرجی کمشن نے ہند امریکہ جوہری معاہدے کا خیر مقدم کیا ہے۔

عالمی نگراں ادارے کے سربراہ محمد البرادی نے ایک بیان میں کہا ہے کہ ہندوستان کو نیوکلیائی ٹیکنالوجی اور ایندھن سمیت توانائی کی سخت ضرورت ہے اور اس معاہدے سے اس کی یہ ضرورت پوری ہوسکے گی۔

اس سے ہندوستان ایک پارٹنر کے طور پر نیو کلیائی عدم توسیع نظام کے اور قریب آئے گا- ’یہ معاہدہ عدم توسیع کے نظام کو مضبوط کرنے، جوہری دہشت گردی کا مقابلہ کرنے اور جوہری تنصیبات کو محفوظ کرنے کی کوششوں کے لیئے بہت بر وقت اور سنگ میل ثابت ہو گا۔‘

اس جوہری معاہدے پر ہندوستان اور امریکہ نے جمعرات کو دستخط کیے ہیں۔اس معاہدے کے نفاذ کے لیئے امریکی کانگریس کی منظوری ضروری ہو گی۔ معاہدے کے تحت ہندوستان کو اپنی جوہری تنصیبات کی نشاندہی فوجی اور غیر فوجی تنصیبات کے طور پر کرنا ہے ۔

غیر فوجی تنصیبات بین الاقوامی ایٹمی توانائی کے معائنے کے دائرے میں آ جائیں گیں-

ڈاکٹر البرادی نے اس بیان میں مزید کہا ہے کہ اس معاہدے کے تحت ہندوستان کو جوہری ٹیکنالوجی اور ایندھن تک قابل اعتبار رسائی حاصل ہو جائے گی۔ اس سے جوہری تنصیبات کی نگرانی کے نظام کو بین اقوامی سطح پر تقویت حاصل ہو گی۔

انھوں نے کہا ’ اس معاہدے سے ہندوستان اور عالمی برادری دونوں کو ہی فائدہ پہنچے گا‘۔