شکیل اختر بی بی سی اردو ڈاٹ کام، دلّی

	فرانسیسی صدر ژاک شیراک بھارتی وزیرِاعظم منموہن سنگھ کے ہمراہ

ملاقات کے بعد بھارتی وزیرِاعظم منموہن سنگھ نے صدر ژاک شیراک کے ہمراہ ایک پریس کانفرنس میں کہا کہ’ ہم بھارت اور عالمی دنیا کے درمیان ایٹمی توانائی کے پرامن استعمال کے معاملے میں فرانس کی کوششوں کو قدر کی نگاہ سے دیکھتے ہیں‘۔

مسٹر شیراک اور ہندوستانی وزيراعظم نے ملاقات میں نیوکلیائی توانائی اور خلائی ٹیکنالوجی میں تعاون کے پہلوؤں پر بھی مفصل بات چیت کی۔ یاد رہے کہ فرانس پہلے ہی غیر فوجی نیوکلیائی تنصیبات کے لیئے ٹیکنالوجی اور ایندھن دونوں ہی فراہم کرنے پر رضامندی ظاہر کر چکا ہے۔

صدر ژاک شیراک اتوار کو ہندوستان کے تین روزہ دورے پر دلی پہنچے تھے۔
ژاک شیراک کے ساتھ اعلٰی عہدے داروں کا ایک وفد بھی ہندوستان آیا ہے۔ اس وفد میں پانچ وزراء سمیت تیس فرانسسی کمپنیوں کے سرمایہ کار اور صنعتکار بھی شامل ہیں۔

بھارت کے فرانس سے بہت قریبی تعلقات ہیں۔ مشینری اور ٹیکنالوجی کے علاوہ فرانس بھارت کو دفاعی سازو سامان کی فراہمی کا بھی ایک بہت بڑ ا ذریعہ ہے۔

مسٹر شیراک نے پچھلے ہفتے ماحولیات کے ایک تنازعہ میں اس وقت براہِ راست مداخلت کی تھی جب انہوں نے’ کلیمنسو‘ نامی بحری جہاز کو ہندوستان پہنچنے سے پہلے واپس آنے کا حکم دیا تھا۔ یہ جہاز گجرات آ رہا تھا جہاں اسے توڑ کر کباڑ میں تبدیل کیا جانا تھا۔

ماحولیاتی تنظیموں کا الزام تھا کہ اس جہاز پر زہریلے مادے لدے ہوئے ہیں جو جہاز توڑنے والے مزدوروں کی صحت کے لیئے خطرناک تھا۔ جہاز واپس چلے جانے سے فرانس اور ہندوستان کے درمیان ایک بڑا تنازعہ پیدا ہونے سے بچ گیا تھا۔