صلاح الدین بی بی سی اردو ڈاٹ کام، دلی

	ریلوے کے وزیر لالو پرساد نے ہری جھنڈی دکھا کر ٹرین کا افتتاح کیا

یہ ٹرین ایک سو پچاس کلو میٹر فی گھنٹے کی رفتار سے چلے گی اور ابتداء میں اسے دلی اور آگرہ کے درمیان میں چلایا گیا ہے۔

دلی، آگرہ اور بھوپال کے درمیان چلنے والی ’شتابدی ایکسپریس‘ ٹرین کی رفتار ایک سو بیس کلو میٹر فی گھنٹہ تھی لیکن اب دلی سے آگرہ کے درمیان اس ٹرین کی رفتار ڈیڑھ سو کلو میٹر فی گھنٹہ کردی گئی ہے اور آگرہ کے بعد بھوپال کے لیے ٹرین کی رفتار پھر معمول کے مطابق ہوگی۔

اس مقصد کے لیے ریل کی پٹری کو باقاعدہ درست کیا گیا ہے اور اب دلی اور آگرہ کے درمیان ایک سو بانوے کلومیٹر کی مسافت دو گھنٹے سے کم وقت میں طے کی جاسکے گی۔

اس سے قبل دلی سے آگرہ کے درمیان سفر کے لیے کم سے کم ڈھائی گھنٹے لگتے تھے۔

ریلوے کے وزیر لالو پرساد یادو نے نئی دلی ریلوے سٹیشن پر ہری جھنڈی دکھا کراس ٹرین کو آگرہ کے لیے روانہ کیا۔ اس موقع پرسائنس و ٹیکنالوجی کے وزیر کپل سبل بھی موجود تھے۔

یادو نے کہا کہ ’اس ریل کے ذریعے ہم اس سروس کا اندازہ کر رہے ہیں اور اگر یہ تجربہ کامیاب رہا تو اسے ممبئی اور کلکتہ جیسے بڑے شہروں کے لیے بھی شروع کیا جائےگا‘۔

بھوپال اور دلی کے درمیان چلنے والی اس نئی شتابدی ایکسپریس ٹرین کے تمام ڈبے اور انجن بھی نیا ہے لیکن اس میں بعض اضافی سہولیات مہیّا کی گئی ہیں۔

یہ ریل ہفتے میں چھ روز چلائی جائے گی اور چونکہ جمعہ کو اگرہ کا مشہور تاج محل بند رہتا ہے اس لیے ٹرین بھی جمعہ کو نہیں چلے گی۔