صلاح الدین بی بی سی اردو ڈاٹ کام، دلی

	مقامی سیاسی رہنما کی پولیس کی حراست میں ہلاکت کے بعد علاقے میں کشیدگی پائی جاتی ہے۔

حالات پر قابو پانے کے لیے علاقے میں غیر معینہ مدت کے لیے کرفیو نافذ کر دیا گیا ہے۔

حکام کا کہنا ہے کہ پولیس فائرنگ میں احتجاج کرنے والے پانچ افراد ہلاک ہوئے ہیں اور مظاہرین نے بھی ایک جھڑپ میں دو پولیس اہل کاروں کو مارڈالا ہے۔ اطلاعات کے مطابق علاقے میں حالات اب بھی کشیدہ ہیں۔

پولیس افسران کے مطابق ککو پاتھر پولیس اسٹیشن میں اجیت مہنتا نامی ایک شخص کی پولیس حراست میں موت ہوگئی تھی جس کے خلاف احتجاج کرنے کے لیے لوگ بڑی تعداد میں تھانے کے پاس جمع ہو گئے تھے اور بے قابو ہجوم پولیس اسٹیشن کو جلانے کی کوشش کر رہا تھا۔

پولیس نےاجیت مہنتا کو شدت پسند تنظیم یونائٹیڈ لبریشن فرنٹ آف آسام یعنی ’الفا‘ کے ساتھ مبینہ طور پر روابط کی بنا پر پوچھ گچھ کے لیے حراست میں لیا تھا لیکن تفتیش کے دوران اس کی موت ہوگئی۔

پولیس حراست میں موت کے خلاف لوگوں میں زبردست غصّہ پایا جاتا ہے۔

پولیس نے پہلے مظاہرین پر آنسو گیس کے گولے پھینکے لیکن جب حالات قابو سے باہر ہوگئے تو گولی چلا دی۔

پولیس فائرنگ سے پانچ لوگ شدید زخمی ہو گئے جو ہسپتال پہنچنے سے پہلے ہی وفات پا گئے۔ پولیس فائرنگ سے بارہ افراد شدید طور پر زخمی ہوئے ہیں۔

حکام کہنا ہے کہ پہلے کرفیو صرف یہ مذکورہ پولیس اسٹیشن کے آس پاس نافذ کیا گیا تھا لیکن جب حالات زیادہ کشیدہ ہوگئے تو تنسکھیا ضلع کے بیشتر علاقوں ميں کرفیو نافذ کیا گیا ہے۔