 |  آسام میں بنگلہ دیشیوں کے حوالے سے ہندو مسلم فسادات ہو چکے ہیں |
بھارت کی شمال مشرقی ریاست آسام میں حکام کا کہنا ہے کہ ہندوؤں اور مسلمانوں کے درمیان تشدد میں سات افراد زخمی ہوگئے ہیں۔ یہ واقعہ تیز پور علاقے میں پیش آیا ہے۔ انتظامیہ کا کہنا ہے کہ اب حالات قابو میں ہیں لیکن علاقے میں اب بھی کشیدگی کا ماحول ہے۔ سرکاری اہل کاروں کے مطابق سخت گیر ہندو تنظیم آر ایس ایس نے اپنے تین حامیوں کی گرفتاری کے خلاف ایک روز کی ہڑتال کی اپیل کی تھی۔ اسی ہڑتال کے دوران دونوں برادریوں کے درمیان جھڑپیں ہوئی ہیں۔ آرایس ایس کے بعض حامیوں نے جماعت اسلامی ہند نامی ایک مسلم تنظیم کے لیڈر کے ساتھ ہاتھا پائی کی تھی اسی لیے پولیس نے تین افراد کو گرفتار کیا تھا۔ اسی دوران دونوں برادریوں کے بزرگ افراد نے تشدد سے بچنے کے لیے ایک امن کمیٹی تشکیل دی ہے۔ یہ لوگ امن کے قیام کے لیے انتظامیہ کی مدد کر رہے ہیں۔ آسام میں اس سے قبل بھی تارکِ وطن بنگلہ دیشیوں کے حوالے سے ہندوؤں اور مسلمانوں کے درمیان فرقہ وارانہ فسادات ہو چکے ہیں۔
| 
یہ صفحہ دوست کو ای میل کیجیئے
پرِنٹ کریں
