کانگریس کے اس اجلاس میں پندرہ سو مندوبین شریک ہیں

یونائیٹڈ پروگریسو اتحاد یعنی یو پی اے میں شریک بائیں بازو کی جماعتوں کے لیے کانگریس کا یہ ان تین ریاستوں کے حوالے سے ایک بہت واضح اشارہ ہے جن میں کیرالا، مغربی بنگال اور تری پورہ شامل ہیں اور جہاں جلد ہی انتخابات متوقع ہیں۔

اس کے ساتھ ہی حیدرآباد میں جاری پارٹی کے بیاسیویں اجلاس میں پیش کی جانے والی قرار داد میں حزبِ اختلاف کی بی جے پی کو بھی کڑی تنقید کا نشانہ بناتے ہوئے کہا گیا ہے کہ سیاسی سوچ میں اور عمل کی کوئی نظریاتی اساس نہ ہونے کی وجہ سے بی جے پی بد نظمی اور انتشار کی شکار ہے۔

قرارداد میں مخلوط حکومتی اتحاد سے وابستگی کو برقرار رکھنے کے عزم کا اعادہ کیا گیا ہے اور کہا گیا ہے کہ یو پی اے حکومت کی کامیابی اس کے شرکاء کی مشترکہ ذمہ داری ہے اور یہ کہ مذہبی انتہا پسندی کی سیاست کرنے والوں نے جو سوچ پیدا کی ہے اس کے اثرات کا سلسلہ ابھی ختم نہیں ہوا ہے۔

حیدرآباد میں جاری تین روزہ کانفرنس کے ابتدائی اجلاس میں پیش کی گئی قرارداد میں یہ واضح اشارہ دیا گیا ہے کہ کانگریس مستقبل قریب میں اتحادی سیاست کی راہ تبدیل کرنے کا کوئی ارادہ نہیں رکھتی اور یونائیٹڈ پروگریسو الائنس کی حکومت کو مضبوط بنانے کی کوششیں جاری رکھے گی۔

اجلاس میں یہ قرارداد سینئر سیاستداں ارجن سنگھ نے پیش کی اور اس میں اتحاد کے تقاضوں کا تفصیلی ذکر کرتے ہوئے کہا گیا ہے کہ اتحاد کو مضبوط بنانا اور باہمی تعلقات کو خوشگوار رکھنا صرف کانگریس ہی کی نہیں دوسری جماعتوں کی بھی یکساں ذمہ داری ہے

اتحاد یکساں ذمہ داری  اتحاد کو مضبوط بنانا اور باہمی تعلقات کو خوشگوار رکھنا صرف کانگریس ہی کی نہیں دوسری جماعتوں کی بھی یکساں ذمہ داری ہے

حکمراں اتحاد میں شامل بائیں بازو کی جماعتیں اکثر حکومت کی اقتصادی پالیسیوں اور امریکہ سے بڑھتے ہوئے تعلقات پر فکر مندی کا اظہار کرتی اور کانگریس کو تنقید کا نشانہ بناتی رہتی ہیں۔