 |  سیلاب سے اٹھارہ کروڑ سینتیس لاکھ ڈالر کے مساوی نقصان ہوا ہے |
شمالی بھارت کا بڑا حصہ سیلابوں سے تو بچ گیا لیکن اندھیرے میں ڈوبنے سے نہیں بچ سکا۔ کہا جاتا ہے کہ سیلاب اپنے پیچھے اس قدر مٹی چھوڑ گیا کہ اس سے پن بجلی گھر بند ہو گیا جس کے نتیجے میں شمالی بھارت میں دور دور تک اندھیرا ہو گیا۔ حکام کا کہنا ہے کہ ابھی تو وہ یہ بھی نہیں بتا سکتے کہ ہما چل پردیش میں واقع پندرہ سو میگا واٹ بجلی پیدا کرنے والے اس بجلی گھر ناتھپا کو کام شروع کرنے میں کتنا وقت لگ جائے گا۔ اتوار کو دریائے ستلُج میں پانی کی سطح بلند ہونےسے ہم چل پردیش کے ہزارہا افراد متاثر ہوئے اور انہیں محفوظ مقامات پر منتقل ہونا پڑا۔ ان میں سیلاب میں پھنس جانے والے وہ سیاح بھی شامل تھے جنہیں ہیلی کاپٹر کی مدد سے نکالا گیا۔ بتایا گیا ہے کہ ہیلی کاپٹر سے نکالے جانے والوں میں غیر ملکیوں کی تعداد انتیس تھی۔ دریا میں پانی اب اتر چکا ہے لیکن حکام کا کہنا ہے کہ وہ اب بھی چوکسی برقرار رکھے ہوئے ہیں۔ بی بی سی سے بات کرتے ہوئے حکام کا کہنا تھا کہ ناتھپا بجلی گھر سیلابی مٹی کے باعث بند کرنا پڑا ہے۔ حکام کا کہنا ہے کہ سیلاب سے اٹھارہ کروڑ سینتیس لاکھ ڈالر کے مساوی نقصان ہوا ہے۔ | 
یہ صفحہ دوست کو ای میل کیجیئے
پرِنٹ کریں
