ریحانہ بستی والا ممبئی

اس بم دھماکے میں دو افراد ہلاک ہوئے تھے اور ملزم کے دورانِ تفتیش موت واقع ہو گئی

بھارت میں پوٹا کا یہ پہلا کیس ہے جس پر عدالت نے اپنا سنایا ہے۔

خصوصی جج اے پی بھنگالے نے ملزمان، وکلاء اور میڈیا سے بھری عدالت میں فیصلہ سناتے ہوئے کہا کہ استغاثہ کے وکیل ملزمان کے خلاف ثبوت فراہم کرنے میں ناکام رہے ہے۔

ڈاکٹر عبدالمتین، عبدالباسط، مزمل، جمیل، عمران، رحمن، محمد الطاف اور توفیق پر الزام تھا کہ انہوں نے بیسٹ بس میں بم رکھنے کی سازش کی تھی اور اس کے پیچھے دماغ دبئی میں مقیم ابو حمزہ اور لشکر طیبہ کا تھا۔ بس میں بم رکھنے کا الزام عارف حسین، عرف پان والا اور رشید انصاری پر تھا۔

ملزم ڈاکٹر متین ممبئی کے مشہور سرکاری جے جے اسپتال میں لیکچرار تھا۔وکیل دفاع مبین سولکر کے مطابق ملزمان سے پولیس نے جواقبالیہ بیان حاصل کیے تھے وہ شکوک و شبہات سے بالا نہیں ہیں۔

ایک ملزم توفیق حامد کو ہندی نہیں آتی ہے لیکن پولیس نے ہندی میں لکھے گئے بیان پر اس کے دستخط لیے تھے۔ بس کے کنڈیکٹر نے بھی ملزموں کو پہچاننے سے انکار کیا تھا۔اس کے علاوہ کیس کےکئی گواہ منحرف ہو گئے تھے۔

اسی معاملے میں اورنگ آباد کے ایک الیکٹرانک انجینئر خواجہ یونس کو بھی پولس نے گرفتار کیا تھا اور اس کی پولیس حراست میں مبینہ طور پر تشدد کی وجہ سے موت ہو گئی تھی۔

خواجہ یونس کی موت کے خلاف عدالت میں چھ پولیس والوں کے خلاف بھی مقدمہ چل رہا ہے اور دو درجن سے زائد پولس والوں نے گرفتاری سے بچنے کے لیے عدالت سے پیشگی ضمانت کی درخواست کی ہوئی ہے۔

ممبئی میں سن دو ہزار چار میں گھاٹ کوپر کے علاقے میں بیسٹ کمپنی کی ایک بس میں بم دھماکہ ہوا تھا جس میں دو افراد ہلاک اور درجنوں زخمی ہوگئے تھے۔

ہندوستان میں پوٹا قانون کے خلاف کافی آوزیں اٹھتی رہی ہیں۔ اس کی بعض دفعات ٹاڈا سے بھی زیاددہ خطرناک تصور کی جاتی ہیں۔ اس میں ملزم کو کم از کم چھ ماہ تک ضمانت نہیں مل سکتی اور پولیس کے سامنے اس کے اقبالیہ بیان ہی کو ثبوت کے طور پر تسلیم کیا جاتا ہے۔ اس طرح کے کئی واقعات سامنے آئے ہیں کہ پولیس زبردستی ملزموں سے بیان لیتی ہے اور پھر انہیں کئی سال تک جیل رکھا جاتا ہے۔