صلاح الدین بی بی سی، دلی

جواہر ٹنل کے علا قے میں تقریبا ایک فٹ برف پھر سے جم گئی ہے

وادی کشمیر کے اونچائی والے علاقوں میں برفباری کے بعد زبردست بارش بھی ہوئی ہے جس کے سبب کئی مقامات پر بڑی بڑی چٹانیں کھسک کر اہم شاہراہ پر آکری ہیں۔ نتیجتا عام زندگی درہم برہم ہوگئی ہے۔

گزشتہ دنوں برفباری کے سبب کشمیر کے تقریبا سبھی راستے بند ہوگئے تھے اور انتظامیہ ابھی انہیں راستوں کو کھولنے میں مصروف تھی کہ یہ برفباری کی نئی لہر شروع ہوئی ہے۔۔

سرکاری بیان کے مطابق جواہر ٹنل کے علا قے میں تقریبا ایک فٹ برف پھر سے جم گئی ہے۔ انتظامیہ کا کہنا ہے کہ بہت سے ٹرک جو سری نگر سے جموں کے لیے چلے تھے انہیں راستے میں ہی روک دیا گیا ہے۔

ابتدائی خبروں کے مطابق اس تازہ برفباری سے کوئی جانی نقصان نہیں ہوا ہے۔ انتظامیہ کا کہنا ہے کہ برف کو ہٹانے کا کام شروع تیزی سے جاری ہے۔ اور ضروری اشیاء کی قلّت سے بچنے کے لیے بعض ٹرکوں کے راستوں میں تبدیلیاں کی گئی ہیں۔
کئی مقامات پر راشن، مٹی کے تیل اور گیس کے لیے لوگوں کو قطار میں کھڑا دیگھ گیا ہے۔ چند روز قبل ہی کشمیر میں زبردست برفباری ہوئی تھی جس میں بہت سے افراد ہلاک ہوگئے تھے۔