 | | | اس سے پہلے ایک عدالت نے برٹنی سپیئرز کی اپنے دو بیٹوں تک رسائی کو منقطع کر دیا تھا۔ |
لاس اینجلس کے ایک جج نے پاپ سٹار برٹنی سپیئرز کے سابق مینیجر سیم لطفی کو حکم دیا ہے کہ وہ برٹنی سپیئرز سے دور رہیں۔ امریکی ضلعی عدالت کے جج پھلپ گوٹیریز نے سیم لطفی کو حکم دیا ہے کہ وہ سترہ مارچ تک برٹنی سپیئرز سے کم از کم دو سو پچاس گز کی دوری بنائے رکھیں۔ اس کے علاوہ انہیں اس عرصے کے لیے برٹنی سپیئرز اور ان کے والدین اور بھائی بہنوں کے گھروں سے دور رہنا ہوگا۔ برٹنی سپیئرز کی ماں نے تین ہفتے قبل دائر کی گئی ایک درخواست میں کہا تھا کہ مسٹر لطفی نے ان کی بیٹی کو بےہوش کرنے کی کوشش کی تھی، ان کے گھر کا ٹیلی فون کاٹ دیا تھا اور برٹنی کے ساتھ برا سلوک کیا تھا۔ اس سے پہلے ایک عدالت نے برٹنی سپیئرز کی اپنے دو بیٹوں تک رسائی کو منقطع کر دیا تھا۔ تین جنوری کو عدالتی نگرانی میں اپنے بچوں سے ساتھ ملاقات کے دوران برٹنی سپیئرز کی ذہنی حالت خراب ہو گئی تھی اور انہیں ہسپتال پہنچایا گیا تھا جس کے بعد وہ اپنے بچوں سے نہیں مل پائی ہیں۔ برٹنی سپیئرز نے حال ہی میں چھ دن ایک ذہنی طور پر بیمار اشخاص کے لیے خصوصی یونٹ میں گزارے۔ انہوں نے بار بار عدالت سے اپیل کی ہے کہ انہیں اپنے بچوں سے دوبارہ ملنے کی اجازت دی جائے مگر اب تک ان کی درخواستوں کو مسترد کیا جاتا رہا ہے۔ عدالت نے برٹنی سپیئرز کے والد جیمز سپیئرز کو ان کے جان و مال کا عبوری سرپرست بنایا ہے۔ برٹنی سپیئرز کی جائیداد تقریباً سو ملین ڈالر تصور کی جاتی ہے۔ اس طرح کی سرپرستی عموماً ایسے لوگوں کے لیے دی جاتی ہے جن کے بارے میں خیال ہو کہ وہ خود اپنا اور اپنے معاملات کا خیال رکھنے کے قابل نہیں ہیں۔ | 
لاس اینجلس میں برٹنی کا بخار
