شہزادوں کا خیال ہے کہ یہ مناظر دکھانے سے ان کی ماں کی یادوں کی ’شدید ناقدری‘ ہوگی

شہزادوں کی غیر سرکاری سیکریٹری نے چینل فور کو ایک خط میں لکھا کہ شہزادوں کا خیال ہے کہ ان مناظر کے دکھانے سے ان کی ماں کی یادوں کی ’شدید ناقدری‘ ہوگی۔

اس کے جواب میں چینل فور نے کہا ہے کہ انہوں نے شہزادوں کے جذبات اور اپنے ناظرین کے احساسات کا موازنہ کرنے کے بعد فیصلہ کیا ہے کہ وہ اپنی بدھ کی نشریات میں مذکورہ مناظر دکھائے گا۔

یہ تصاویر ایک فرانسیسی فوٹو گرافر نے اگست انیس سو ستانوے میں اس وقت لی تھیں جب شہزادی ڈیانا پیرس میں کار کے حادثے میں ہلاک ہو گئی تھیں۔

شہزادوں کی سیکریٹری جیمی لاؤتھر پنکرٹن نے گزشتہ جمعہ کو چینل فور کے تاریخ، سائنس اور مذہب کے شعبے کے انچارج ہمیش مائکورا کو اس سلسے میں ایک خط لکھا تھا۔

	شاہی ترجمان کے مطابق خط شہزادہ ولیم (دائیں) کے کہنے پر لکھا گیا

سیکریٹری نے جن مناظر کا خاص طور پر ذکر کیا ان میں وہ تصاویر شامل ہیں جن میں ڈیانا کو تباہ شدہ کار کے اندر پھنسے ہوئے اور ایک ایمرجنسی اہلکار کو انہیں طبعی امداد دیتے دکھایا گیا ہے۔‘

ان کا کہنا تھا ’اگرچہ یہ حقیقت ہے کہ ان تصاویر میں شہزادی ڈیانا کا چہرہ نظر نہیں آتا لیکن ان میں انکی زندگی کے آخری دردناک لمحات بہرحال دکھائی دیتے ہیں۔‘

بی بی سی کے نامہ نگار برائے شاہی امور نکولس وِچل نے اس بارے میں کہا ہے کہ انکے خیال میں یہ خط شہزادہ ولیم کے کہنے پر بھجوایا گیا ہے۔

اس بارے میں کنزویٹو پارٹی کےسربراہ ڈیوڈ کیمرون کہا کہ چینل فور کو خود سے ایک سوال کرنا چاہیے ’ کیا ہم یہ پروگرام اس لیے نشر کر رہے ہیں کہ عوام کو واقعی اس کی ضرورت ہے یا ہم ایسا محض اپنی تسکین کے لیے کر رہے ہیں۔‘

	ڈیوڈ کیمرون نے کہا کہ چینل فور کو خود سے ایک سوال کرنا چاہیے

چینل فور کے سربراہ نے کہا ہے کہ ان کا مقصد شہزادوں کو پریشان کرنا نہیں لیکن ’ہم نہیں سمجھتے کہ پروگرام دکھانے کے فیصلے سے ہم شہزادی ڈیانا کی یادوں سے کھیلنا چاہتے ہیں۔‘

چینل فور کے ہمیش مائکورا، جنہوں نے مذکورہ پروگرام بنانے کی منظوری دی تھی، نے کہا کہ یہ فلم شہزادی ڈیانا کی یادوں کے ساتھ کوئی زیادتی نہیں ہے۔ ’ہم نے اس فلم میں جو لکیر عبور نہیں کی وہ یہ ہے کہ ہم نے شہزادی کا زخمی یا مردہ جسم نہیں دکھایا ہے۔‘

شاہی امور کے ایک ادارے کلیرنس ہاؤس کا اس سلسلے میں کہنا تھا کہ شہزادوں کا خیال تھا کہ چینل فور کو اپنے تحفظات سے آگاہ کرنا ان کا حق تھا۔

گزشتہ ہفتے جب سے مذکورہ فلم پر بحث شروع ہوئی ہے ذرائع ابلاغ کے نگران ادارے ’آفکوم‘ کو اس سلسلے میں سترہ شکایات موصول ہوئی ہیں، لیکن یہ ادارہ کسی بھی پروگرام پر کوئی اقدامات صرف اس صورت میں لے سکتا ہے جب پروگرام نشر ہو چکا ہو۔