یہ ایک اچھی کامیابی ہے: محمد الفائد

ہائی کورٹ نے یہ فیصلہ محمد الفائد کی درخواست پر سنایا ہے۔ اس رُولنگ سے شاہی محل کی بیرنس کےاس فیصلے کی قانونی حیثیت ختم ہوگئی ہے کہ وہ اکیلے ڈیانا اور دودی کی موت کی تفتیش کریں گی۔

ہائی کورٹ کے تین سینیئر ججوں نے کہا کہ انکؤسٹ کی کارروائی ایک جیوری کے ہاتھوں ہونی چاہیے۔ محمد الفائد نے اس فیصلہ پر کہا کہ یہ ان کے لیے اچھی فتح ہے۔

رولنگ کے بعد انہوں نے کہا :’اگرچہ یہ ایک اچھی کامیابی ہے لیکن دراصل یہ میری دس سال سے جاری جدوجہد کا آغاز ہے جو میں انصاف کے حصول کے لیے کر رہا ہوں۔‘

محمد الفائد نے کہا کہ اب شاہی خاندان کی بڑی شخصیات یعنی شہزادہ فلپ اور شہزادہ چارلس گواہوں کے کٹہرے میں کھڑے ہونے کے لیے تیار ہو جائیں۔

ہائی کورٹ کے اس فیصلے سے قبل شاہی محل کی تفتیش کار لیڈی بٹلر سلاس کا کہنا تھا کہ ڈیانا کی موت کی تفتیش کا تقاضہ یہ ہے کہ ’صرف ایک کورونر ہی ایک محتاط اور مکمل فیصلہ دے سکتا ہے۔‘

تاہم جمعہ کو ہائی کورٹ نے ان کے اس موقف کے خلاف فیصلہ دے دیا ہے۔

عدالت کا کہنا تھا کہ شہزادی ڈیانا جیسی موت جیسے معاملات میں کورونر پر لازم ہے کہ وہ اکیلے فیصلہ کرنے کی بجائے جیوری بلائے۔