ریحانہ بستی والا بی بی سی اردو ڈاٹ کام، ممبئی

	فلمساز روی چوپڑہ نے بلیک اینڈ وائٹ فلم ’نیا دور‘ کو رنگین شکل دی ہے (فائل فوٹو)

فلم کا پریمیئر آٹھ جون کے آس پاس ہو گا جس میں دلیپ کمار کی شرکت متوقع ہے۔ فلمساز بی آر چوپڑہ نے یہ فلم انیس سو ستاون میں بنائی تھی۔ جس میں دلیپ کمار اور مدھوبالا مرکزی کرداروں میں تھے۔ بی آر چوپڑ ہ کے بیٹے روی چوپڑہ نے اس فلم کو رنگین شکل دی ہے۔

بی آر چوپڑہ نے بی بی سی سے بات کرتے ہوئے کہا: ’پرانی بلیک اینڈ وائٹ فلموں کو رنگین بنانے کا مقصد یہ ہے کہ نئی نسل ان فلموں کو دیکھے۔ اس لیے میں نے اپنے والد کی سات فلموں کو رنگین بنانے کا فیصلہ کیا ہے جس میں گمراہ، قانون اور دُھول کا پھول شامل ہے‘۔

انہوں نے بتایا کہ اس فلم کو رنگین بنانے میں تقریباً چار کروڑ روپے خرچ ہوئے ہیں۔ ان کے مطابق فلم ’مغل اعظم‘ سے انہوں نے ایک سبق سیکھا ہے۔

	فلم ’مغل اعظم‘ ہندی سنیما کی وہ پہلی بلیک اینڈ وائٹ فلم ہے جسے رنگین بنایا گیا (فائل فوٹو)

واضح رہے کہ فلم ’مغل اعظم‘ ہندی سنیما کی وہ پہلی بلیک اینڈ وائٹ فلم ہے جسے رنگین بنایا گیا ہے۔

بی آر چوپڑہ کہتے ہیں کہ اس فلم کو دیکھ کر لگتا تھا کہ جیسے کسی نے تصویروں کو پینٹ کر دیا ہے۔اس کی اصل خوبصورتی ختم ہو گئی تھی۔

چوپڑہ کا کہنا تھا: ’انہیں یاد نہیں کہ فلم کی شوٹنگ کے دوران اداکاروں نے کون سے رنگ کے کپڑے پہنے تھے تاہم انہوں نے یہ کوشش کی ہے فلم ایسی نظر آئے جیسے اسے رنگین فلم کے طور پر شوٹ کیا گیا ہے۔ فلم کے پرنٹس کو ڈیجیٹلی درست کرتے ہوئے اس میں 5.1 سٹیریو فونک ساؤنڈ کا استعمال کیا گیا ہے‘۔

وہ چاہتے ہیں کہ پرانے وقتوں کی بلیک اینڈ وائٹ فلمیں رنگین بنائی جائیں کیونکہ اس دور کی فلموں میں آج کی دور کی نسل کے لیے ایک سبق ہے۔ ان کا کہنا تھا کہ انہوں نے راج کپور کے بیٹوں رشی اور رندھیر کپور کو اپنے والد کی پرانی فلموں کو رنگین بنانے کا مشورہ دیا ہے۔

فلم ’مغل اعظم‘ کے بعد مینا کماری کی فلم ’دل اپنا اور پریت پرائی‘ کو بھی رنگین بنانے کا کام جاری ہے۔

پرانے وقتوں کی اداکارہ نمی علی رضا نے پرانی فلموں کو رنگین بنانے پر بی بی سی سے بات کرتے ہوئے کہا: ’مجھے مغلِ اعظم رنگین لبادے میں بہت اچھی لگی۔ اُس دور کی یاد تازہ ہو گئی۔ اب ہر فلم رنگین بن کر کتنی اچھی لگے گی یہ تو دیکھنے کے بعد ہی بتایا جا سکتا ہے۔‘